Almatyda balalarǵa arnalǵan áleýmettik klýbtar ashylady
ALMATY. QazAqparat – Almaty ákimi Baqytjan Saǵyntaev megapolıste balalarǵa arnalǵan áleýmettik klýbtar ashylatyny týraly málim etti, dep habarlaıdy QazAqparat tilshisi.
«Aǵa býynnyń belsendi ókilderi — burynǵy oqytýshylar, mýzykanttar, ártister tárbıe jumysyna atsalysýda. Olar az qamtylǵan jáne kópbalaly otbasylardyń balalaryna «Aınabulaq – 2» yqshamaýdanyndaǵy «Shyńǵa Órleý» áleýmettik klýbynda sabaq ótkizedi»,– dep jazdy Baqytjan Saǵyntaev Instagram-daǵy paraqshasynda.
Onyń aıtýynsha, klýbta sanıtarlyq-epıdemıologııalyq qaýipsizdiktiń barlyq sharalary saqtalady. Qyzmettiń bul túrlerine ruqsat berilgennen keıin munda beıneleý óneri, akterlik sheberlik, vokal, mýzyka men bı, dombyra, doıby jáne shahmat úıirmeleri ashylady. Sondaı-aq, munda emdik dene shynyqtyrý jáne ózindik daıyndyq saǵattary bar. Kez-kelgen bala qyzyǵýshylyq tanyta alady. Eki aýysymda jumys isteıtin klýb 50 kelýshige arnalǵan.
«Eń bastysy, balalar otbasylyq atmosferada qamqor ata-ájelerdiń baqylaýynda bolady. Biz osy áleýmettik jobany keńeıtip, taǵy úsh klýb ashatyn bolamyz»,– dep atap ótti ákim.
