Almatyda balalardyń úıirmege tegin qatysýy úshin 4,5 mlrd teńge bólinedi – qala ákimi

ALMATY. QazAqparat - Almatyda balalardyń sport sektsııalary men shyǵarmashylyq úıirmelerge tegin qatysýy úshin qosymsha 4,5 mlrd. teńge bólinbek. Bul týraly Almaty ákimi Erbolat Dosaev máslıhat sessııasynda málim etti, dep habarlaıdy QazAqparat tilshisi.

Almaty ákiminiń málimetinshe, Almatyda búginde 44 myńnan astam bala 594 sport sektsııasyna, 56 myń bala 1 179 shyǵarmashylyq úıirmege tegin qatysady.

«Bul Prezıdentimizdiń bastamasy. Ony almatylyqtar jaqsy qabyldap otyr. Sebebi, túsip jatqan ótinishter legi óte kóp. Bul 2,6 mlrd. teńge somasyna kredıttik bereshektiń qalyptasýyna sebep boldy (1,7 mlrd. tg. – sport, 900 mln. tg. - mádenıet). Osyǵan baılanysty, Prezıdenttiń tapsyrmasyn oryndaý maqsatynda biz qosymsha 4,5 mlrd. teńge qarastyryp otyrmyz. Onyń 3 mlrd. teńgesi sport sektsııalaryna jáne 1,5 mlrd. teńgesi shyǵarmashylyq úıirmelerge bólinedi», - dedi Erbolat Dosaev.

Almaty ákimi sondaı-aq jazǵy mektep demalysyn eskere otyryp, bıyl 1 qyrkúıekke deıin Almaty qalasy ózine alǵan barlyq mindettemelerdi oryndaıtynyn málimdedi.