Almatyda balalardyń telefonyn tartyp alýdy kásip qylǵan adam ustaldy
ALMATY. QazAqparat – Almaty polıtsııasy jasóspirimderdiń telefonyn tartyp alýdy kásipke aınaldyrǵan adamdy ustady, dep habarlaıdy QazAqparat tilshisi.
Polıtsııa departamentiniń baspasóz qyzmeti habarlaǵandaı, 33 jastaǵy er adam ózin jasóspirimderge polıtsııa qyzmetkeri retinde tanystyryp, tekserý úshin kerek degen jeleýmen qoldaryndaǵy telefondaryn tartyp alyp otyrǵan.
«Ol polıtsııa kıimin kımegen. Qujattaryn kórsetpegen. Sonda da qalada 3 balanyń telefonyn tartyp alǵan. 14-16 jastaǵy balalardy tańdap alyp, olarǵa ózin polıtsııa qyzmetkerimin dep tanystyrǵan. Balalarǵa osy «aýdanda qylmys bolǵandyqtan, telefondardy tekserip júrmin» dep sendirgen. Osylaısha birneshe telefondy qoldy etken. Al urlyq jolmen alynǵan oljasyn qoldan qolǵa satyp otyrǵan», - dedi Medeý aýdandyq polıtsııa basqarmasynyń basshysy Bolat Totybaev.
Qazir kúdikti ýaqytsha oqshaýlaý ornyna qamaldy.
Polıtsııa bul kisiniń áreketinen japa shekken adamdar bolsa, 254-48-75, 254-48-72, 8-775-222-24-51 jáne 102 telefondaryna habarlasýdy suraıdy.
