Almatyda balalardyń sport úıirmelerine qatysýyn ákimdik tóleıdi – Saǵyntaev

ALMATY. QazAqparat - Almatyda balany sporttyń 71 túri boıynsha tegin úıirmege jazýǵa bolady. Bul týraly «Almaty» telearnasynyń Akimat LIVE tikeleı efırinde qala ákimi Baqytjan Saǵyntaev málim etti, dep habarlaıdy QazAqparat tilshisi.

Ákimniń aıtýynsha, qalada 40 myńǵa jýyq balany tegin sporttyq úıirmemen qamtý josparlandy. «Bıyldan bastap sport úıirmelerindegi jattyǵýlarǵa balalardyń aqysyn Almaty ákimdigi tóleıtin bolady. Bul maqsatqa 1,5 mıllıard teńge bólindi. Tegin úıirmelerge barlyǵy 40 myńǵa jýyq balany qamtý josparlandy. Sport túrin balanyń qalaýy boıynsha tańdaýǵa bolady», - dedi ákim.

Bul memlekettik sporttyq tapsyrysty jan basyna normatıvtik qarjylandyrýdy engizýdiń arqasynda múmkin boldy. «Tegin úıirmelerge 4 jastan 18 jasqa deıingi balalar qatysa alady, sondaı-aq, sporttyń 71 túrin tańdaýǵa bolady. Al eń qolaıly úıirmeni úıden shyqpaı-aq, artsport.edu.kz saıtynan tańdaı alasyz. Muny ata - analardyń ózderi saıtqa tirkelý arqyly jasaı alady», - dep naqtylady B.Saǵyntaev.

Qazirgi ýaqytta 24 myń ótinish berýshige tegin sabaqtar úshin vaýcherler berildi. 26 sport túri boıynsha 18 630 bala jattyǵýlarǵa kiristi. Fýtbol, taekvondo, karate, júzý jáne dzıýdo úıirmeleri eń kóp suranysqa ıe boldy. Búgingi tańda memleket tarapynan úıirmelerdegi jattyǵýlarǵa jalpy somasy 141 mln teńge tólendi. Bólingen qarajat boıynsha Almaty óńirler bólinisinde jáne úıirmelerde is júzinde aınalysatyn balalar sany boıynsha birinshi oryn alady.