Almatyda balalardyń saýnadaǵy «jazǵy demalysynan» keıin búkil lagerler tekserilip jatyr
Almaty qalasy ákimdiginiń málimetinshe, balalar demalysyn uıymdastyrý máselesi boıynsha mamandandyrylǵan balalar mekemeleriniń kýratorlarymen birge jumys kúsheıdi.
«Tıisti talapqa saı emes eki lagerdegi jaǵdaıǵa baılanysty bilim basqarmasy barlyq balany basqa eki lagerge kezeń-kezeńimen jiberý jóninde sheshim qabyldady. Osylaısha, «Bel Rıchı» JShS-men («Arman dala» lageri) kelisimshartty buzatyn boldyq. Bul kompanııany jaýapsyz qyzmet kórsetýshi dep taný úshin sotqa talap aryz berildi. Aqsha tólenbedi»,- dep habarlady ákimdikten.
Buǵan qosa, qalalyq bilim basqarmasynyń qyzmetkerleri balalardy «Taý samaly» lagerine («Aısulý jáne T» JShS) kirgizbeý jóninde sheshim qabyldady.
Lagerge joldyń qashyqtyǵyn jáne balalardyń erekshe qajettiligin eskere otyryp, olar Qaskeleń qalasyndaǵy jeke mektepke ýaqytsha ornalasty.
Balalardyń qaýipsizdigin qamtamasyz etý úshin medıtsınalyq qyzmetkerler táýlik boıy kezekshilik etedi.
«Januıa» mamandandyrylǵan kesheniniń tárbıelenýshileri osy mektepte bolǵanda olarǵa alty ret tamaqtandyrý, mádenı is-sharalar uıymdastyryldy.
Qazirgi tańda Almaty qalasynyń bilim basqarmasy balalardyń jazǵy demalysyn uıymdastyrý boıynsha shartta belgilengen mindettemelerdiń sapasyz oryndalýyna baılanysty «Aısulý jáne T» JShS-ne shartty buzý týraly eskertý jiberdi.
Almatyda demalys kezinde kópbalaly jáne az qamtylǵan otbasynan shyqqan 3000-ǵa jýyq bala, ata-ana qamqorlyǵynsyz qalǵan 100 bala, sonymen qatar, erekshe bilim berý qajettiligi bar balalardy qala syrtyndaǵy lagerlerge demalýǵa jiberý josparlanyp otyr.
Búgin Almaty ákimdigi BAQ ókilderine balalar lagerleri boıynsha baspasóz týryn uıymdastyrady.
Buǵan deıin almatylyq oqýshylardyń demalýǵa jazǵy lagerge emes, saýnaǵa jiberilgenin habarlaǵanbyz.
Almaty prokýratýrasy saýna ǵımaratynda balalar lagerin uıymdastyrý isi boıynsha tergeý bastady.
Keıinnen depýtattar saýnadan balalar lagerin ashqan kásipker utyp alǵan tenderdiń quny 107 mln teńge ekenine kóz jetkizdi.
