Almatyda balalardyń qolynan telefonyn tartyp alǵan jigit ustaldy

ALMATY. QazAqparat- Almatyda jasóspirimderdiń qolynan uıaly telefondy tartyp alyp ketken jigit ustaldy, dep habarlaıdy QazAqparat tilshisi.

Almaty qalalyq Polıtsııa departamentiniń málimetinshe, 22 jastaǵy N. esimdi er adam 12-15 jas aralyǵyndaǵy balalardyń telefonyn tartyp alǵan. Ol kámeletke tolmaǵandardyń qasyna kelip, bir ret qońyraý shalý úshin telefondy surap, sodan keıin qashyp ketken.

«Buryn sottalmaǵan jas jigit óziniń áreketin aqshanyń jetispeýshiligimen túsindirdi. Qazir ol Polıtsııa departamentiniń ýaqytsha ustaý ızolıatorynda qamaýda otyr», – dedi Naýryzbaı aýdandyq Polıtsııa basqarmasynyń bastyǵy Dıdar Ahanov.

Kúdiktige QR QK-niń 191-baby (Tonaý) boıynsha sotqa deıingi tergeý amaldary júrgizilýde.