Almatyda balalardy uryp-soqqan tárbıeshi jumystan qýyldy
ALMATY. QazAqparat - Almatyda №140 balabaqsha meńgerýshisi men tárbıeshisi qyzmetinen bosatyldy, dep habarlaıdy QazAqparat tilshisi.
Ata-analar osy baqshadaǵy balalarynyń taıaqpen tárbıelenip otyrǵanyn aıtyp, prokýratýraǵa shaǵymdanǵan bolatyn. Atap aıtqanda, tárbıeshi Perızat Aıazbekovaǵa qatysty shaǵym kóp. Ata-analar taratqan vıdeoda tárbıeshiniń balalardy syzǵyshpen uryp, aıaqtaryn basqany anyq kórinedi.
Almaty ákimdigi bul oqıǵaǵa baılanysty túsinikteme berdi.
«Bilim basqarmasy №140 balabaqshada oryn alǵan keleńsiz jaǵdaıǵa baılanysty mynany habarlaıdy. Atalǵan balabaqsha tárbıeshisi Perızat Aıazbekova «Báıterek» tobyna 3 aılyq synaq merzimimen 2018 jyldyń 17 tamyzynda qabyldanǵan. 2018 jyldyń 8 qazanynda negizgi tárbıeshi jumysqa shyǵa almaı, onyń ornyna tárbıeshi bolǵan P. Aıazbekovaǵa qatysty meńgerýshiniń atyna ata-analardan shaǵym túsken», - dedi ákimdikten.
Ata-analar shaǵymy balabaqshanyń óndiristik jıynynda qaralǵan.
Al №140 balabaqsha meńgerýshisi Bilim basqarmasynyń 2018 jylǵy 24 qazandaǵy №105 buıryǵy boıynsha qyzmetinen bosatyldy.
Pedagogıkalyq etıkany buzyp, baldyrǵandarǵa dórekilik kórsetkeni úshin Perızat Aıazbekova 2018 jyldyń 10 qazanynda №64 buıryq negizinde jumystan bosatylǵan.
Bilim basqarmasy mektep jasyna deıingi balalar mekemeleriniń basshylarymen jáne qyzmetkerlerimen birneshe ret jıyn ótkizgen. Onda búldirshinderge dórekilik kórsetý faktilerine jol bermeý, balalardyń densaýlyǵyn qorǵaý talaptaryn qatań saqtaý, ásirese psıholıgııalyq salaýattylyqqa erekshe mán berý jóninde eskertken.
