Almatyda balalardy urlaý týraly jalǵan aqparat taratqan áıel ustaldy
ALMATY. QazAqparat - Almaty qalalyq polıtsııa basqarmasynyń jedel izdestirý bólimshesiniń qyzmetkerleri balalardy jappaı urlaý týraly aqparat tartqan adamdy anyqtap, ustady, dep habarlaıdy QazAqparat tilshisi.
«Ol almatylyq 1991 jyly týǵan áıel bolyp shyqty. Áıel óziniń shynymen qoǵamda negizsiz dúrbeleń men úreı týǵyzǵan aýdıo habarlamanyń avtory ekenin moıyndady. Ol bul rastalmaǵan aqparatty qurbysy aıtty túsindirdi. Qazirgi ýaqytta onyń áreketteri QRQK 274-baby 2-bóligi boıynsha PD tergeý basqarmasynda aqparattyq-kommýnıkatsııalyq júıeler arqyly jalǵan aqparat taratty degen aıyp taǵylyp otyr. Sotqa deıingi tergeý bastaldy », - dedi Almaty qalalyq PD krımınaldyq polıtsııabasqarmasynyń bastyǵy Janbolat Zıadın.
Ustalǵan áıel óz kezeginde, ókinishin bildirip, almatylyqtardan keshirim surady.
«Meniń daýsymmen taraǵan habarlama kópshilik arasynda úreı týdyrdy. Men Almaty qalasynyń turǵyndarynan keshirim suraımyn. Shynymdy aıtsam, bul áleýmettik jelilerde tarap, búkil qalada qorqynysh týǵyzady dep kútken joqpyn. Ótinip suraımyn keshirińizdershi», - dedi ol.
«Shyndyǵynda, áleýmettik jeli halyqtyń obektıvti jáne senimdi aqparat alýyna múmkindik beretin alań bolýy kerek. Ókinishke qaraı, keıbir adamdar áleýmettik jelilerdi ózderiniń qylmystyq maqsattaryna jetý úshin ǵana qoldanady. Al ınternet paıdalanýshylar shyndyq pen ótirikti ajyrata almaı qalady. Onyń rastyǵyna kóz jetkizbesten ózderiniń tanystaryna jiberedi. Mine sodan keıin halyq arasynda úreı týyndaıdy. Tolqý bastalady. Mundaı áreketke barǵandar zań aldynda jaýap beredi. QRQK 274-babyna sáıkes qylmystyq jaýaptylyq qarastyrylatyndyǵyn taǵy da eske salamyn», - dep qorytyndylady Janbolat Zıadın.
Esterińizge sala keteıik, keshe Almaty qalalyq polıtsııa departamenti qala men Almaty oblysynda balalardy jappaı urlaý týraly habarlamany joqqa shyǵarǵan bolatyn.
