Almatyda Balalardy qorǵaý kúnine oraı balalar sýretteriniń kórmesi ashyldy

Almaty qalasy bilim basqarmasy men Oqýshylar saraıynyń uıymdastyrýymen ashylǵan kórmege Kórkemóner mektepteri oqýshylarynyń baıqaýdan ótken eń úzdik týyndylary qoıylǵan. Baıqaý «MPL» kompanııasynyń uıymdastyrýymen «Shyǵys pen Batys arasyndaǵy kópirdi ornatý» jobasy aıasynda ótkizilgen.

«MPL» kompanııasy dırektory Larısa Indjýdjıannyń aıtýynsha, sýret baıqaýynyń dúnıege kelýine qazaqstandyq tanymal músinshi Edýard Kazarıannyń «Madonna» atty kórmesi yqpal etken. «Oqýshylar saraıynda óner stýdııasynyń oqýshylary úshin Edýard Kazarıannyń sheberlik synyptary ótkizilgen bolatyn. Sol dáriske qatysqan oqýshylar baıqaýǵa da qatysty. Biz bul kórmege oqýshylardyń 22 jumysyn usynyp otyrmyz»,-dedi ol.

Shara barysynda bes atalym boıynsha baıqaýdyń jeńimpazdary anyqtaldy. Qazylar alqasy taqyryptyń ashylýyna, jumysqa kreatıvti kelýine, tús sheshimderin taba bilýine, tehnıkalyq oryndalýyna mán bergen. "Jeńimpazdardy tańdaý ońaı bolǵan joq. Jumystardyń árqaısysy joǵary baǵaǵa laıyqty. Meniń oıymsha, balalar úshin úlken syılyq Parıjde ótetin kórmege joldama alý bolmaq. Ol shara jeltoqsan aıynda el Táýelsizdiginiń 20 jyldyǵy qurmetine oraı Frantsııanyń Qazaqstan elshisin resmı qabyldaýy aıasynda ótedi",-dedi L. Indjýdjıan.

Shara sońynda baıqaý jeńimpazdary sýret salýǵa qajetti quraldar toptamasymen jáne Parıjden ákelingen arnaıy kádesyılarmen marapattaldy.

Uıymdastyrýshylardyń aıtýynsha, osy syndy baıqaý men kórme kúzge qaraı Almaty men Atyraýda taǵy da uıymdastyrylatyn bolady.

Shara Balalardy qorǵaýdyń halyqaralyq kúnine arnalǵan merekelik is-sharamen jalǵasty.