Almatyda balalardy delfındermen emdeýge arnalǵan ońaltý ortalyǵy ashyldy (FOTO)
Bul Ońaltý ortalyǵy Almatydaǵy «Nemo» delfınarıesi bazasynda qurylǵan. Munda Ýkraınadan kelgen tájirıbeli mamandar jumys atqarady.
Osy ortalyqtaǵy delfınoterapııa bóliminiń jetekshisi Alekseı Polışýk bul em-shara sal jáne aýtızm dertine shaldyqqan balalarǵa qoldanylatyndyǵyn jetkizdi.
Qara teńizdiń delfınderi adamnyń ortalyq júıke júıesine, ımmýndyq jáne basqa da zat almasý úderisterine oń áser etedi eken.
Delfınniń qatysýymen bolatyn dárister estý jáne sóıleý qabileti nashar naýqastardyń osy qabiletterin damytady. Ártúrli bulshyq etterdi kúsheıtý arqyly fızıkalyq kúıin jaqsartady, jan kúızelisin azaıtyp, nevrologııalyq jaǵdaıyn tynyshtandyrady.
«Árıne, delfınoterapııa sýdan jáne teńiz janýarlarynan qoryqpaıtyn balalarǵa qoldanylady. Bul em-shara birneshe kezeńnen turady. Barlyǵy 10 seansty quraıdy. Bir kýrs 25 myń teńge turady. Bizde mysaly, aýtızm dertine shaldyqqan Dana esimdi búldirshin bolatyn. «Mama» degen sózden basqa eshteńe aıtpaıtyn. Birneshe seanstan keıin ol qazir 7 sózge deıin aıta alady», - dedi A. Polışýk.
Almaty qalasy ákiminiń orynbasary Arman Qyryqbaevtyń aıtýynsha, búginde qalada erekshe qajettilikti talap etetin 7 myńdaı bala ómir súredi. Olardyń ishinde 3 myń bala túzetý bilim berý uıymdarynda dáris alady. «Almaty qalasyn damytý 2020» baǵdarlamasyna sáıkes, 2020 jylǵa qaraı, osyndaı balalardy barynsha tolyq qamtý josparlanǵan. Sonymen qatar ol, búgin Almatyda sal dertine dýshar bolǵan balalardy ońaltý boıynsha tıisti Memorandýmǵa qol qoıylǵandyǵyn jetkizdi.
«Delfınoterapııa shyn máninde óte kúrdeli psıhoemotsııalyq, psıhofızıkalyq úderister. Ol psıhoterapııalyq áserge ıe. Delfındermen aınalysqannan keıin balalardyń este saqtaý, zeıin qoıyp tyńdaý jáne eńbekke degen qabileti artady. Al jalpy, delfınderdiń shyǵaratyn dybysy balany damytýǵa óte paıdaly», - dedi A. Polışýk.
