Almatyda balalar jazýshysymen ádebı kesh ótti
ALMATY. QazAqparat – Táýelsizdiktiń 30 jyldyǵy men 2021 jyl «Balalar ádebıeti» jyly dep jarııalanýyna baılanysty Almaty qalalyq Ortalyqtandyrylǵan kitaphana júıesiniń №33 kitaphana-bólimshesinde «Meniń jasyl álemim» atty ádebı kesh ótti, dep habarlaıdy QazAqparat tilshisi.
Іs - shara balalar jazýshysy, baspager, Qazaqstan Jazýshylar odaǵynyń múshesi, «Daraboz» halyqaralyq syılyǵynyń laýreaty «Molia & DOS» baspahana kesheniniń dırektory, respýblıkalyq «Abıtýrıent», «Týrıst» gazetteriniń bas redaktory Baıan Bolathanovanyń «Meniń jasyl álemim» áńgimesin negizge ala otyryp, qalamgerdiń shyǵarmashylyǵyna arnalǵan oqyrman men jazýshy arasyndaǵy kezdesý formatynda uıymdastyryldy.
Ádebı keshke belgili aqyn, Halyqaralyq «Alash» ádebı syılyǵynyń ıegeri Aıan Nysanalın, Ál-Farabı atyndaǵy Qazaq ulttyq ýnıversıtetiniń Jýrnalıstıka fakýltetiniń Baspagerlik – redaktorlyq jáne dızaınerlik óner kafedrasynyń meńgerýshisi, ekonomıka ǵylymynyń kandıdaty, professor Jetpisbaı Bekbolatuly, Ádebıet zertteýshisi, jýrnalıst, «Rýh» baspasynyń dırektory, belgili baspager Habdına Baljan, Qazaqstan Respýblıkasynyń eńbek sińirgen ərtisi, «Qurmet» ordeniniń ıegeri Sulýshash Nurmaǵambetova, Talǵar qalalyq balalar mýzyka mektebiniń vokal pániniń muǵalimi Zabıra Atantaeva jáne kitaphananyń turaqty oqyrmandary, mektepterdiń oqýshylary, kitaphanashylary, ata-analar qatysty.
«Ádebı kezdesý óte qyzyqty, erekshe ótti. Sebebi, balalar jazýshy apaılarynyń «Tuıaq» batyr, «Balyqtar», «Máńgilik el» «Qurbaqa aıtqan áńgime» ertekterin jatqa oqydy. «Bıbijar men Boıtumar» hıkaıatyn, «Meniń jasyl álemim», «Qaraqııadaǵy kókpar», «Itbalyq», «Sarykójek» áńgimelerin mazmundap, qyzyqtyrǵan saýaldaryn qoıdy. Kishkentaı kitapqumarlardyń suraqtaryna jazýshy jaýap berip otyrdy», - deıdi Ortalyqtandyrylǵan kitaphana júıesiniń №33 kitaphana-bólimshesiniń meńgerýshisi Isabekova Qýanysh.
Qazaqtyń kórnekti aqyny, synshy Aıan Nysanalın qalamger qaryndasy Baıan Bolathanovanyń eń alǵashqy eńbek jolyn, respýblıkalyq «Lenınshil jas» gazetinde birge qyzmet atqarǵan jyldary týraly esteligin áńgimelep berdi. Úzeńgiles zamandastary, belgili baspager Habdına Baljan men jas jýrnalısterge tálim-tárbıe berip júrgen ustaz-ǵalym Jetpisbaı Bekbolatuly, Baıan Bolathanovanyń shyǵarmashylyǵyna jan-jaqty toqtalyp baǵa berdi.
«Baıan Bolathanovanyń balalarǵa arnalǵan áńgimeleri men ertekteri áli zerttelmegen taqyryp. Balalardyń ulttyq tanym zerdesin oıatatyn qanyq boıaýǵa toly kórkem týyndylar»,- dedi Habdına Baljan.
«Baıan Bolathanova shyǵarmalaryn kópten beri zerttep kelemin. Oı-paıymdarym baspasózge shyqqan da bolatyn. «Qazaqtyń Qarshyǵasy», «Gaýhartas» atty kórkem derekti týyndylary elimizdiń mádenı memýarlyq ádebıetinen oıyp turyp oryn alady», - dep atap ótti Jetpisbaı Bekbolatuly.
Kesh barysynda balalar kúı tartyp, merekege arnalǵan taqpaqtaryn oqydy.
Kesh sońynda sharaǵa belsene qatysqan oqyrmandarǵa avtor-jazýshynyń qoltańbasy qoıylǵan «Qaragóz-ǵumyr» atty kitaptary syıǵa berilip, Ortalyqtandyrylǵan kitaphana júıesiniń dırektory Qabıeva Rozanyń atynan maqtaý qaǵazdary tapsyryldy.
Al jas oqyrmandarǵa jazýshy Baıan Bolathanova: «Qazaq tiliniń, ádebıetiniń bolashaǵy ózderindeı zerek, kitapty súıip oqıtyn balalardyń qolynda dep oılaımyn» dep senim bildirdi.
