Almatyda balalar úıiniń tárbıelenýshilerine syılyqtar taratyldy
ALMATY. QazAqparat - Almatyda balalar úıiniń tárbıelenýshilerine sporttyq qurylǵylar men qysqy kıimder taratyldy, dep habarlaıdy QazAqparat tilshisi.
Táýelsizdiktiń 30 jyldyǵy aıasynda «Januıa» balalar úıiniń tárbıelenýshilerine syılyqtar tapsyrý rásimi ótti. Qala ákiminiń orynbasary Erjan Babaqumarov balalar úıiniń tárbıelenýshilerine sporttyq qurylǵylar men qysqy kıimder jıyntyǵyn tabys etti.
Atalǵan sharaǵa Almaty qalasy ákiminiń orynbasary Erjan Babaqumarov, Іle aýdany qoǵamdyq keńesiniń tóraǵasy jáne «Sagadat batyr – QTT» klýbynyń qurmetti prezıdenti Erbolat Turymbetov, sondaı-aq djıý-djıtsý jáne grepplıng boıynsha álem chempıonattarynyń jeńimpazdary men júldegerleri, klýbtyń jattyqtyrýshylary men tárbıelenýshileri qatysty.
Qazirgi ýaqytta balalar qala ákimdigimen birlesken joba aıasynda «Sagadat batyr-QTT» sport klýbynda djıý-djıtsýmen tegin aınalysady. Olardyń keıbireýleri jańadan kelgender arasynda týrnırdiń júldegeri atanyp úlgerdi.
Erjan Babaqumarov balalardyń sportqa degen qyzyǵýshylyǵyn oń baǵalap, jarystarda sáttilik tiledi.
«Klýbta 200-den astam sportshy jattyǵady. Klýb janynan «Baqytty bolashaq» qoǵamdyq qoryn ashtyq, onyń aıasynda halyqtyń áleýmettik osal toptarynan shyqqan balalar úshin tegin sabaqtar, qaıyrymdylyq aktsııalaryn ótkizemiz. Almaty qalasy ákimdiginiń qoldaýymen jáne metsenattardyń arqasynda búgin «Januıa» balalar úıiniń 20 balasyna qysqy syrt kıim men kımono syılaımyz. Bizdiń maqsatymyz tárbıelenýshilerimizdi álem chempıondaryna aınaldyrý», - dep atap ótti aralas jekpe-jek palýany, «Sagadat Batyr» klýbynyń bas bapkeri Nursultan Orynbasarov.
Almaty ákimdiginiń málimetinshe, qalada qazirgi tańda 4-ten 17 jasqa deıingi 243 myńnan astam bala sportpen shuǵyldanady. Megapolıste túrli menshik túrinde 3400 nysan jumys isteıdi. Bos ýaqytta sportpen aınalysýǵa bolatyn 100 tynyǵý ortalyǵy jumys isteıdi, onda 8 myńnan astam adamdy qamtıtyn 36 sport sektsııalary men úıirmeleri tegin ári qoljetimdi. Balalardy tegin sport sektsııalarymen qamtýdy keńeıtý maqsatynda jan basyna qarjylandyrý tetigi belsendi qoldanylady.
Memlekettik sporttyq tapsyrys boıynsha 4-ten 18 jasqa deıingi balalarǵa arnalǵan tegin sektsııalarda sporttyń 71 túri júzege asyrylady. Mamandandyrylǵan áleýmettik mekemelerde sportpen aınalysýǵa jaǵdaı jasaý úshin jumystar júrýde.
