Almatyda balalar úıiniń tárbıelenýshileri konkı tebýdi úırenedi
ALMATY. QazAqparat – 20 jeltoqsannan bastap Almaty ákimdiginiń qoldaýymen qaladaǵy áleýmettik muz aıdyndarynda balalar úıiniń tárbıelenýshileri úshin tegin úırený naýqany bastalady, dep habarlaıdy QazAqparat tilshisi.
Bul sharanyń maqsaty - jas urpaqty sportqa baýlý jáne salaýatty ómir saltyn nasıhattaý.
Uıymdastyrýshylardyń aıtýynsha, nusqaýshylar 10-15 jas aralyǵyndaǵy balalarǵa konkı tebýdi úıretpek. Arasynda ystyq sháı beriledi. Balalarǵa Jańa jyl qarsańynda syılyqtar da qarastyrylǵan.
Bul naýqan muz aıdyndary jumys istep turǵanǵa deıin jalǵasa bermek. Barlyǵy 80-nen astam bala konkı tebýdi úırenedi.
Eske salaıyq, osy maýsymda qalada konkı tebý úshin tórt alań uıymdastyrylǵan. Olardyń úsheýi - Tuńǵysh Prezıdent parkinde, 28 panfılovshylar saıabaǵynda jáne Naýryzbaı aýdany ákimdiginiń aldynda, tórtinshisi – Túriksib aýdanyndaǵy «MART» SO aldyndaǵy alańda ornalasqan.
Elaman Turysbekov
