Almatyda balalar úıiniń azyq-túligine qol suqqan ury ustaldy
ALMATY. 7 qazan. QazAqparat /Ádilet Musahaev/ - Almatyda balalar úıinen 68 myń teńgeniń azyq-túligin jymqyryp ketken 33 jasar jigit ustaldy,
dep málimdeıdi qalalyq ІІD-niń baspasóz qyzmeti.
Qylmysqa ol el uıqyǵa batqan kezde barǵan. Al azyq-túlik ǵımarattyń jer tólesinde saqtalǵan.
«Bul balalar úıine syrttan ury keledi degen oı bolmaǵan, sondyqtan jertóleniń aýyzyna qulyp salynbaǵan. Ury osyny tıimdi paıdalanyp, ǵımaratqa ońaı enip, azyqtardy asyqpaı orap alyp ketken», - deıdi Jetisý aýdandyq ІІB-nyń bastyǵy polıtsııa polkovnıgi Qanat Taımerdenov.
Alaıda ury óz oıyn iske asyra almaǵan. Óıtkeni bul nysan tártip saqshylarynyń qatań baqylaýynda bolǵan. Osy aýmaqty baqylap júrgen «Boran-103» sholǵynshy ekıpajy boı tasalamaq bolǵan jaıaý júrginshini nazaryna alyp toqtatqan.
«Ustalýshynyń esh qujaty bolmaǵan, ári qatty qobaljyp sezik týdyrǵandyqtan, ol aýdandyq ishki ister departamentine jetkizildi. Tergeý barysynda ol qolyndaǵy sómkedegi zattardy urlap alǵandyǵyn moıyndady. Al ol ýaqytta balalar úıiniń qyzmetkerleri zattarynyń urlanǵandyǵynan beıhabar edi», - deıdi polkovnık Q. Taımerdenov.
