Almatyda balalar úıinde tárbıelenýshilerdiń jumystary qoıylǵan jármeńke ashyldy
ALMATY. Naýryzdyń 17-si. QazAqparat /Názıra Eleýhan/ - Búgin Almatyda «Naýryz» degen atpen balalar úıinde tárbıelenýshilerdiń jumystary qoıylǵan jármeńke bastaldy,
dep habarlaıdy QazAqparat.
Atalmysh sharanyń uıymdastyrýshysy - «Aıala» qaıyrymdylyq qory.
Jármeńkege №1, №2 qalalyq balalar úıiniń, № oblystyq balalar úıiniń jáne №7 arnaıy mamandandyrylǵan mektep-ınternatynda tárbıe alýshy balalardyń Naýryz merekesine arnap jasaǵan jumystary qoıylǵan.
«Balalar jumystaryn jyldyń basynan bastap daıyndady. Jármeńkeler qalanyń barlyq qonaqúılerinde qoıylatyn bolady. Jınalǵan qarajattar №7 mektep-ınternattyń qajetine beriledi. Búgin jármeńkeniń birinshi kúni, sondyqtan qansha somany jınaıtyndyǵymyzdy aıtý qıyn. Eki-úsh kúnnen keıin nátıjesi belgili bolady. Árıne, kóbirek jınalsa, balar úshin de jaqsy bolar edi», dedi «Aıala» qorynyń áleýmettk jobalar jetekshisi Ksenııa Mandjgaladze. Onyń aıtýynsha, balalardyń jumysy 10 myń teńgeden 30 myń teńgege deıin turady.
Búgin «Almaty» qonaqúıinde ótip jatqan jármeńke naýryzdyń 19-na deıin jalǵasady. Al, Naýryzdyń 22-si kúni «Intercontinental» otelinde, 24 men 25-i kúnderi «Hyatt Regency Almaty» otelinde, 29-31 naýryz kúnderi «Rixos» otelinde, al sáýirdiń 1-i men 2-i kúni «Astana» qonaqúıinde ótedi. Atalmysh shara tańerteń 11-den keshki 6-ǵa deıin jumys isteıdi.
