Almatyda balalar shyǵarmashylyǵynyń sýret kórmesi ashyldy
ALMATY. 5 qarasha. QazAqparat /Názıra Eleýhan/ - Búgin Almatydaǵy Ortalyq kórme zalynda «Armanǵa qulash sermeý» dep atalatyn balalar shyǵarmashylyǵynyń sýret kórmesi ashyldy.
«Kreatıv» kommertsııalyq emes qoǵamdyq qorynyń dırektory Lım Djonoktyń uıymdastyrýymen ashylǵan kórmege onyń 5 jastan 18 jasqa deıingi shákirtteriniń jáne óziniń Mixed Media (aralas materıal) tehnıkasymen salynǵan sýretteri qoıylǵan.
Balalardyń ár týyndysynan olardyń armanyn, úmiti men qalaýyn kórýge bolady. Kórmeniń uıymdastyrýshysy Lım Djonoktyń aıtýynsha, usynylǵan kórme ár kelýshige búgingi kúnnen «erteńi jaqyn» bolǵan jarqyn kúnderge qulash sermeýge múmkindik beredi.
Ashylý saltanatynda balalar óz sýretterin ǵana usynyp qoımaı, fortepıano, qobyz, gıtara sııaqty aspaptarda oınaı alatyndyqtaryn kórsetti.
Kórme jumysy qarashanyń 18-ne deıin jalǵasady.
«Kreatıv» kommertsııalyq emes qoǵamdyq qory - áleýmettik jaǵdaıy nashar otbasylarmen jáne olardyń balalarymen áleýmettik, bilim berý, mádenı salasy boıynsha jobalarmen jumys isteıtin uıym.
