Almatyda balalar ólimi týraly jalǵan aqparatty taratýshy quryqtaldy
ALMATY. 30 naýryz. QazAqparat - Almaty polıtsııasy balalardyń ólimi týraly jalǵan aqparat taratýshyny anyqtap, ustady.
Esterińizge sala keteıik, eki kún buryn ǵalamtorda 3 pen 12 jas aralyǵyndaǵy 12 bala sapasyz dári-dármekterden kóz jumdy degen aqparat taratylǵan bolatyn. Bul aqparat turǵyndar arasynda birshama úreı týǵyzdy.
Óz kezeginde bul aqparatty Almaty qalasy Densaýlyq saqtaý basqarmasy, sonymen qatar QR Densaýlyq saqtaý mınıstrliginiń Sot medıtsınasy ortalyǵynyń Almatylyq fılıaly teriske shyǵarǵan edi. Basqarma sondaı-aq, sońǵy aılardyń ishinde qala statsıonarlarynda dári-dármektiń kesirinen balalarda allergııalyq reaktsııa paıda bolýy týraly oqıǵalardyń tirkelmegeni jaıynda habarlaǵan bolatyn.
Bul isti dereý Almaty qalasynyń ІІD qolǵa alyp, jedel tekserý jumystaryn júrgizdi. Sonyń nátıjesinde polıtsııa qyzmetkerleri jalǵan aqparatty taratqan adamdy ustady. Ol Astana turǵyny bolyp shyqty jáne jaýap alý barysynda bul aqparat týraly tanystarynan estigenin, ony teksermesten ǵalamtorǵa salǵandyǵyn aıtqan.
Qazirgi ýaqytta onyń ústinen qylmystyq is qozǵalyp, tekserý jumystary júrgizilýde.
