Almatyda balalar festıvali bastaldy

ALMATY. QazAqparat - Ońtústik astanada «Almaty BALAFEST – 2023» baıqaýy bastaldy. Festıvalge 300 myń bala qatysady dep josparlanyp otyr, dep habarlaıdy QazAqparat tilshisi.

Festıvaldiń basty ıdeıasy-balalardyń shyǵarmashylyq qabiletin damytý jáne qoldaý úshin qalada júzege asyrylyp jatqan úzdik jobalar men bastamalardy biriktirý.

Festıval 300 myń balany qamtıdy jáne 3 kezeńde (mektep, aýdandyq, qalalyq) 7 baǵyt boıynsha konkýrstar ótkiziledi:

- «Juldyzdy sát»

- «Boıaýlar qupııasy»

- «Ónerli bala»

- «Kitap – bilim bulaǵy»

- «Jasyl Almaty»

- «OpenAir Sport»

- «Hakaton – IT Universe»

1 maýsym kúni is-sharanyń 1000-nan astam jeńimpazdaryn marapattaý rásimi ótedi. Іs-shara barysynda bıyl halyqaralyq jáne respýblıkalyq zııatkerlik olımpıadalardyń 50 altyn medal ıegerine qurmet kórsetiledi. Úzdik jetistikterdiń arqasynda Almaty qalasynyń qurama komandasy 18 jyldan beri «QR Úzdik olımpıadalyq komandasy» atanyp keledi.

Sondaı-aq festıval aıasynda ózge de merekelik is-sharalar ótedi. Kishkentaı qala turǵyndaryn ertegi keıipkerleri, mýltfılmder men komıksterdiń keıipkerleri qyzyqtyrady. Balalar úshin tanymdyq oıyndar, sporttyq jarystar, sheberlik synyptary, kórmeler jáne basqa da kóptegen oıyn-saýyqtar uıymdastyrylmaq. Sonymen qatar, balalarǵa arnalǵan aýmaqta fotoaımaq qurylady.

Aıta keteıik, alǵashqy festıval Memleket basshysynyń qatysýymen 2022 jyly Balalar jyly aıasynda ótti.