Almatyda balalar arasynda nevrologııalyq aýrýlar órship tur
ALMATY. QazAqparat- Almatyda balalar neırohırýrgııasynyń ózekti máseleleri jáne emdeýdiń ınnovatsııalyq ádisterine arnalǵan bilim berý kýrsy ótip jatyr, dep habarlaıdy QazAqparat tilshisi.
Shara barysynda dárigerler balalardyń bas mıynyń jaraqaty, gıdrotsefalııa, qarynshanyń endoskopııalyq zertteýleri, mı isikteri, ıntramedýlıarly julyn isikteri, bas súıek deformatsııasy, glıoma nemese uryq jasýshalary isikterin emdeý joldaryn talqylady.
«Bul qalamyz úshin óte mańyzdy shara. Balalar arasynda jıi kezdesetin nevrologııalyq aýrýlardyń aldyn-alý jáne emdeý joldaryn qarastyryp jatyrmyz», - dedi Almaty qalasynyń №2 klınıkalyq aýrýhanasynyń bas dárigeri Marat Rabandııarov.
Bilim berý kýrsyna Tel-Avıv medıtsınalyq ortalyǵynyń jetekshi neırohırýrgi, jańa týǵan nárestelerdegi mı men julyn isikterin zertteý boıynsha maman, professor Shlomı Konstantın arnaıy keldi.
«Men osymen Qazaqstanǵa jetinshi ret kelip otyrmyn. Almaty - qarqyndy damyp kele jatqan qala. Sondyqtan neırohırýrgııanyń damýyna qatysty mundaı sharany ótkizý óte mańyzdy. Men pedıatrııa men neırohırýrgııaǵa qatysty óz oıymen bólistim. Eń bastysy dárigerler aýrýdy kóre bilý kerek. Olar durys dıagnoz qoıýy qajet. Qazir balalar arasynda gıdrotsefalııa men týa bitken aýytqýlar jıi kezdesedi. Biz óz elimizde Izraılde jylyna mı jaraqatyna baılanysty 500-den astam operatsııa jasaımyz. Qazaqstannan da túrli dıagnozdary bar naýqastar keledi», - deıdi Shlomı Konstantın.
Dárigerlerdiń aıtýynsha Almatyda týa bitken damý kemistikteri bar, sırek kezdesetin aýrýlarǵa shaldyqqan balalar sany artyp keledi. Bas mıy qan tamyrlarynyń arterıaldy anevrızmalary - mıdyń qan tamyry qabyrǵalarynyń juqarýynan paıda bolady. Bul týa bitti dert. Gıdrotsefalııa – julyn suıyqtyǵyn óndirý men sińirý arasyndaǵy tepe-teńdiktiń buzylýynan jáne onyń bas mıynyń qarynsha júıesinde artyǵymen jınalýynan týyndaıtyn aýrý. Balalardyń tserebraldy sal aýrýy (DTsP) – júıke-býyn qyzmetiniń buzylýy. Bas mıynyń sarysýly isigi-bas mıynyń týa bitken anomalııasy, ol julyn suıyqtyǵymen tolǵan bas mıynyń torly qabaǵy qalyptastyrǵan bas mıynyń búıir sańylaýy. Osyndaı dertke shaldyqqan balalarǵa durys em júrgizý dárigerlerdiń basty mindeti bolyp otyr.
Bas mıynyń túrli isikteri - balalar arasynda keńinen taralǵan ózgerister. Balalar mıy isiginiń 40%-ǵy sýbtentorıaldy nemese medýlloblastomalar bolyp keledi, sonymen birge kranıofarıngıoma, túrinde bolýy múmkin. Mamandardyń paıymdaýynsha bala kezde paıda bolǵan isikterdi emdeýge múmkindik bar.
Bul sharany Balalarǵa arnalǵan №2 qalalyq klınıkalyq aýrýhanasy, Shashkin Clinic zamanaýı nevrologııa jáne neıroreabılıtatsııa klınıkasy, Qazaq medıtsınalyq úzdiksiz bilim berý ýnıversıteti uıymdastyrdy.
