Almatyda balalar arasynda qyzylshamen aýrýshańdyq deńgeıi ósken
ALMATY. QazAqparat - Almatyda qyzylshamen syrqattanýshylyq boıynsha turaqsyz epıdemıologııalyq jaǵdaı baıqalady. Bul týraly Almaty qalasy sanıtarııalyq-epıdemıologııalyq baqylaý departamenti basshysynyń orynbasary Ásel Qalyqova aıtty, dep habarlaıdy QazAqparat tilshisi.
Dárigerdiń aıtýynsha, megapolıste naýryz aıynan beri qyzylshanyń 651 zerthanalyq rastalǵan jaǵdaıy tirkeldi, onyń ishinde 14 jasqa deıingi balalar arasynda 543 jaǵdaı, bul 83,4% quraıdy.
«Balalar arasyndaǵy aýrýshańdyq negizinen vaktsınatsııadan bas tartý sebebinen bolǵan, sondaı-aq, vaktsınatsııadan medıtsınalyq bosatý jáne egý jasyna jetpeý saldarynan tirkeledi. Profılaktıkalyq jáne epıdemııaǵa qarsy is-sharalar júrgizýdiń nátıjesinde 9784 qarym-qatynasta bolǵan tulǵa anyqtaldy, qyzylshaǵa qarsy 277 adam egildi. Barlyq baılanysqa túsken adamdar medıtsınalyq baqylaýǵa alyndy, oshaqtarda qyzylshanyń aldyn alý boıynsha sanıtarııalyq jumystar júrgizildi», - dedi Ásel Qalyqova.Onyń sózinshe, qyzylshany juqtyrýdan, onyń asqynýynan saqtanýdyń jalǵyz joly - vaktsınatsııa.
«Qyzylshaǵa qarsy vaktsınatsııa 1 jasta jáne 6 jasta eki ret jasalady, bul adamdarda ómir boıy bolatyn ımmýnıtetti damytýǵa múmkindik beredi. Qyzylshaǵa qarsy vaktsınanyń árbir alynǵan dozasy balanyń ımmýnıtetin kúsheıtedi. Ekpelerdi salý úshin Dúnıejúzilik densaýlyq saqtaý uıymy sertıfıkattaǵan jáne Qazaqstanda tirkelgen vaktsına qoldanylady. Vaktsınatsııa turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi. Aıta keteıin, 8 maýsymda Almaty qalasy qoǵamdyq densaýlyq saqtaý basqarmasynyń vaktsına qoımasyna DDU sertıfıkattaǵan jáne Qazaqstanda tirkelgen 37 200 doza mólsherinde qyzylshaǵa, qyzamyqqa, epıdemııalyq parotıtke (QKP) qarsy vaktsına ákelindi», - dedi dáriger.
Onyń sózinshe, balalardy josparly vaktsınatsııalaý turǵylyqty jeri boıynsha qalanyń emhanalarynyń barlyq egý kabınetterinde tegin júrgiziledi. Qalǵan turǵyndar aqyly negizde jeke egý kabınetterinde ekpe ala alady.
