Almatyda balalar 1 maýsymda qoǵamdyq kólikte tegin júretin boldy
ALMATY. QazAqparat - Almatyda balalar qoǵamdyq kólikte tegin júretin boldy. Mundaı syılyqty 1 maýsym - halyqaralyq balalardy qorǵaý kúnine baılanysty qalalyq tasymaldaýshy kásiporyndar uıymdastyrdy, dep habarlaıdy QazAqparat tilshisi.
Qalalyq ákimdiktiń baspasóz qyzmeti habarlaǵandaı, 1 maýsymda 15 jasqa deıingi balalar qoǵamdyq kólikte tegin júredi.
Dál osyndaı aktsııa qalalyq Metropolıtende de uıymdastyryldy.
«Bir rettik aktsııa halyqaralyq Balalardy qorǵaý kúnine oraı uıymdastyrylyp otyr. Erteń 15 jasqa deıingi balalar tańǵy 06:20 men 23:30 aralyǵynda metroda tegin júre alady. Ol úshin balalardyń jasyn rastaıtyn qujattyń fotosy bolýy tıis», - dedi metronyń baspasóz qyzmetinen.
Aıta ketý kerek, Almatyda balalardy qorǵaý merekesi úsh kún qatarynan toılanatyn boldy. 1 maýsymda Almatyda jastar men balalar mýzykalyq orkestrleriniń sherýi ótedi. Sonymen qatar, saýda jáne oıyn saýyq ortalyqtary aldynda merekelik kontsertter josparlanǵan.
2-3 maýsym aralyǵynda «Shymbulaq» taý shańǵysy kýrortynda otbasylyq merekelik shara - Family day ótedi.
