Almatyda balabaqshalar qashan ashylady
ALMATY. QazAqparat – 1 maýsymynan bastap balabaqshalarda kezekshi toptar (jasy boıynsha) uıymdastyrylatyn bolady, dep habarlaıdy QazAqparat tilshisi.
«Karantın jaǵdaıynda balabaqshalardyń jumysqa daıyndyǵyn obektıvti túrde baǵalaý maqsatynda Bilim basqarmasynyń buıryǵymen quramyna epıdemıolog-mamandar, Taýarlar men qyzmetterdiń sapasy men qaýipsizdigin baqylaý departamentiniń qyzmetkerleri, aýdandyq ákimdikter men «Nur Otan» partııasynyń jáne qoǵamdyq uıymdardyń ókilderi kirgen 9 monıtorıngtik top quryldy»,– dep habarlady qalalyq ákimdiktiń baspasóz qyzmeti.
Qazirgi ýaqytta monıtorıngtik top múshelerimen mektepke deıingi uıymdardaǵy kezekshi toptardyń daıyndyǵy tekserilýde. Balabaqsha daıyndyq aktisin alǵannan keıin ǵana ashylady.
Mektepke deıingi uıymdardyń kezekshi toptaryn ashý úshin kelesi sanıtarlyq-epıdemıologııalyq rejımdi qatań saqtaýy qajet:
- balalardy kezekshi toptarǵa ýchaskelik pedıatrdyń densaýlyǵy týraly bergen anyqtamasymen qabyldaý, odan keıin bala 3 jumys kúninen artyq bolmaǵan jaǵdaıda tekserip qabyldaý;
- balany mektepke deıingi uıymdarǵa myna sanattaǵy tulǵalardyń ákelýine bolmaıdy: sońǵy 14 kúnde koronavırýs jaǵdaılary tirkelgen shet elderden jáne óńirlerden kelgen tulǵalar, júkti áıelder, 65 jastan asqan tulǵalar, ótkir respıratorlyq aýrý belgileri baıqalǵan tulǵalar;
- qyzmetkerlerdi jumysqa COVID-19-ǵa (PTR, kúni 7 kúnnen keshiktirilmegen) zerthanalyq zertteýdiń teris nátıjesi bolýy usynylady.
