Almatyda balabaqsha qunynyń eki ese tómendeýi barlyq sanattaǵy turǵyndarǵa qatysty - G. Aıtqulova
ALMATY. QazAqparat- Almatyda balabaqsha qunynyń eki esege deıin tómendegeni tek áleýmettik az qamtylǵan otbasylaryna ǵana emes, barlyq sanattaǵy turǵyndarǵa qatysty. Bul týraly búgin Almatyda ótken baspasóz brıfıngi barysynda Almaty qalalyq Bilim Basqarmasy jetekshisiniń orynbasary Gúlnar Aıtqulova málim etti.
«Buǵan deıin buqaralyq aqparat quraldarynda baǵanyń tómendeýi tek áleýmettik az qamtylǵan otbasylaryna ǵana tıesili ekendigi týraly jalǵan aqparat tarady. Bul shyndyqqa janaspaıdy. Baǵanyń tómendegeni barlyq sanattaǵy turǵyndarǵa qatysty! ıAǵnı, buǵan deıin balabaqshalarda sharýashylyq esep tobynda bolyp kelgen 2 jastan 5 jasqa deıingi balalar memlekettik qarjylandyrý júıesine alyndy. Endi bıylǵy 1 aqpannan bastap, olarǵa tólenetin aılyq tólemaqy 15 myń teńgeden aspaıtyn bolady. Buǵan deıin tólemaqy quny - 27 myń teńgeden astam bolatyn. Al endi qazirgi tólenetin aqsha tek balalardyń tamaǵyna ǵana jumsalady. Bes jastan asqan balalar onsyz da burynnan memlekettik qarjylandyrý júıesende bolyp kelgen», - dedi G. Aıtqulova.
Sonymen qatar ol, balabaqsha qunynyń tek bir jyl merzimge ǵana arzandatylmaǵanyn jetkizdi.
«Baǵa tek bir jylǵa deıin ǵana eki esege tómendegen joq. Bul baǵa budan keıingi jyldary da saqtalatyn bolady. Sáıkesinshe, kelesi jyldyń bıýdjeti bekitilerde osy baǵany saqtap turý maqsatynda bıýdjetten tıisti qarjy bólinedi. Al ázirge qala bıýdjetinen 3 mlrd teńgedeı qarjy bólinip otyr. Bul bıylǵy jylǵa arnalǵan», - dedi G. Aıtqulova.
Aıta ketelik, 2016 jyldyń 27 qańtarynda Almaty qalalyq Máslıhatynyń 50-shi sessııasynda depýtattar memlekettik balabaqshaǵa baratyn bir bala úshin tólenetin aqy qunyn 15 myń teńgeden asyrmaý jóninde qaýly qabyldaǵan bolatyn.
Búgingi tańda Almatyda 420 bala baqsha jumys isteıdi. Olarǵa 54 401 bala barady. Al kezekte turǵan balalardyń sany - 38 myńnan asady.
