Almatyda bala urlamaqshy bolǵan tárbıeshi sottaldy
ALMATY. QazAqparat – Almatyda balabaqshadan bala urlamaqshy bolǵan Saıagúl Jańalyq 6 jylǵa bas bostandyǵynan aıyryldy, dep habarlaıdy QazAqparat tilshisi.
Saıagúl Janalyq QRQK 24-baby 3-tarmaǵy (Qylmysqa daıyndalý jáne qylmys jasaýǵa áreket etý) jáne 125 baby 2 tarmaǵy (Adam urlaý) boıynsha aıypty dep tanylyp, 6 jylǵa bas bostandyǵynan aıyryldy. Ol jazasyn ortasha qaýipsizdik mekemesinde óteıtin bolady.
Sot otyrsynda Saıagúl Jańalyq barlyq kinásin moıyndady.
«Maǵan taǵylǵan aıyptarmen tolyq kelisemin. Іstegen isimdi moıyndaımyn. Kinálimin. Sol úshin qatty uıalamyn», - dedi sottalýshy Saıagúl Jańalyq.
Sot úkimi zańdy kúshine engen joq. Sottalýshy bul sheshimge 15 kún ishinde shaǵymdanýǵa quqyly.
Esterińizge sala keteıik,16 shilde kúni Almatyda bet-álpetin jasyrǵan áıel balabaqshadan bala urlamaq bolǵan. Alaıda, jaman oıyn iske asyra almady. Keıin, 25 shildede kúdikti áıel Almaty oblysy Kegen aýdanyndaǵy ata-anasynyń úıinde ustaldy. 30 jastaǵy kúdikti sol balabaqshanyń tárbıeshisi bolyp shyqty.
Osy oqıǵadan keıin, Almaty qalalyq bilim basqarmasy megapolıstegi balabaqshalar balany týystaryna notarıaldy kýálandyratyn senimhatty kórsetken kezde ǵana alýyna ruqsat etiletinin aıtty.
Keıinirek, №96 bóbekjaı-balabaqashasynyń meńgerýshisi Natalıa Karaseva, bala urlamaq bolǵan tárbıeshiniń áleýmettik jaǵdaıy jaman emes, eńbekaqysy basqa áriptesterimen salystyrǵanda edáýir joǵary ekenin jetkizdi.
