Almatyda bala ólimi tirkelgen aýrýhanada tekserý bastaldy
ALMATY. QazAqparat - Almatyda Qoǵamdyq densaýlyqty saqtaý departamenti bala ólimi tirkelgen aýrýhanany tekserýge kiristi, dep habarlaıdy QazAqparat tilshisi.
Bul týraly qalalyq densaýlyq saqtaý basqarmasynyń baspasóz qyzmeti málimdedi.
Qaıǵyly oqıǵa 19 tamyzda Almatydaǵy balalar juqpaly aýrýlar aýrýhanasynda bolǵan.
18 tamyzda Almatydaǵy balalar juqpaly aýrýlar aýrýhanasyna jelsheshek (vetrıanaıa ospa) juqpasymen qarqyndy terapııa palatasyna Danat esimdi bala túsken.
Dárigerler balanyń jaǵdaıyn aýyr dep baǵalady. Olardyń aıtýynsha, keýde tusy jaraqat alyp, aǵzasy juqpanyń kesirinen ıntoksıkatsııaǵa ushyraǵan.
Kishkentaı patsıent kezekshi dáriger men reanımatolog dárigerdiń baqylaýynda bolǵan. Sonymen qatar keńes alýǵa S.Asfendııarov atyndaǵy ýnıversıtettiń kafedra meńgerýshileri de tartyldy.
Alaıda, jasalǵan barlyq em-sharalaryna qaramastan 19 tamyzda balanyń jaǵdaıy nasharlaı túsken.
Dárigerler balanyń janyn arashalap qalý úshin 16 saǵat kúresti. Soǵan qaramastan balanyń qan aınalymy toqtap, bul dúnıemen qosh aıtysty.
Balanyń ne sebepti ólgenin tekserý úshin barlyq materıaldar men anasynyń shaǵymy qalalyq polıtsııaǵa tapsyryldy.
Búginde polıtsııanyń tapsyrýymen qalalyq Qoǵamdyq densaýlyqty saqtaý departamenti ınfektsııalyq aýrýhanany kezekten tys tekserýdi bastady.
Tergeý organdary aýrýhanada balanyń neden kóz jumǵanyn anyqtaý úshin arnaıy sot-medıtsınalyq saraptama taǵaıyndady. Basqarma tekserý nátıjesine oraı tıisti sharalar qoldanatyn bolady.
