Almatyda bala densaýlyǵyn saqtaýǵa arnalǵan qaıyrymdylyq kıno kórsetilimi ótedi
ALMATY. 15 jeltoqsan. QazAqparat /Erbol Turymbetov/ - Almatyda 26 jeltoqsanda «Horshylar» atty frantsýz dramasynyń qaıyrymdylyq kórsetilimi ótedi. Shara mıdyń sal aýrýyna (MSA) shaldyqqan 4 jasar Nurtas Shalqarǵa kómektesý maqsatynda ótkizilgeli otyr.
Ony «Komanda SOS» eriktiler úılestirý ortalyǵy, Oleg Boretskıı kınoklýby jáne atalmysh fılm qoıylatyn «Tsezar» kınoteatry birlese uıymdastyrýda.
Balaǵa 6 aılyq kezinde MSA dıagnozy qoıylǵan. Ata-anasy balanyń densaýlyǵyn saqtaýǵa baryn salýda, Nurtas Aqtóbe, Almaty, Astana jáne Astrahanda emdelýde. Onyń jaǵdaıy jaqsaryp keledi, alaıda, áli kúnge deıin ol ózi otyryp-turyp, sóıleı almaıdy. Ómirge degen qushtarlyǵy men deni saý bolǵysy keletinin ol tek kózderimen ǵana jetkize alady. Dárigerler Nurtastyń aıaǵynan turyp ketýine múmkindik baryn aıtady, ol úshin úzdiksiz em qabyldaý kerek. Al oǵan 6 myń AQSh dollary qajet.
Qaıyrymdylyq kórsetilimine kirý 500 teńge bolady. Sonymen birge, kınoteatrda Nurtasqa qosymsha kiris beretin eriktiler boksy ótedi. Barlyq jınalǵan qor Nurtastyń em-domyna jumsalatyn bolady.
Rejısser Krıstof Barrateniń «Horshylar» fılmi soǵystan keıingi Frantsııa ınternaty tárbıelenýshileriniń qıyn taǵdyryn kórsetedi. Sonymen qatar, fılm - meıirimdiliktiń zulymdyqtan, adamgershiliktiń jaýyzdyqtan, búgingi jalǵyzdyqtan sheksiz armannyń basym túsýi jaıly ertegi. Fılmniń bas keıipkerleri - qataldyqtan basqany kórmegen qıyn jasóspirimder. Taǵdyrdyń jazýymen olar sıqyrly án álemine kirip, ózi men qorshaǵan ortaǵa jańasha kózqaraspen qaraýǵa múmkindik alady.
