Almatyda «Baqytty otbasy» ortalyqtary volonterlerimen birlese jumys istemek

ALMATY. QazAqparat – Almatyda «Baqytty otbasy» ortalyqtary volonterlerimen birigip áleýmettik kómek alýshylardyń qataryn keńeıtýdi josparlap otyr. Bul týraly baspasóz máslıhatynda ortalyq jetekshisi Zýlfııa Baısaqova aıtty, dep habarlaıdy QazAqparat tilshisi.

Bıyldan bastap aýdan ortalyqtary jańa jumys formatyn bastaıdy. Negizgi maqsaty-ómirlik qıyn jaǵdaılarda júrgen otbasylardy anyqtaý, áıelder kásipkerligin damytý, balalarǵa arnalǵan túrli kýrstardyń jumysyn ilgeriletý, jumysqa ornalasýǵa yqpal etý, volonterler lıgasymen yntymaqtastyq ornatý.

«Baqytty otbasy» — bul kópbalaly analar men az qamtylǵan otbasylarǵa ǵana arnalǵan ortalyq emes. Biz maqsatty topty keńeıtkimiz keledi, sondyqtan «Nur Otan» jastar qanatynyń volonterlerin jumyldyryp, olarmen birge otbasylardy anyqtaý boıynsha keń kólemdi aktsııalar ótkizýdi josparlap otyrmyz», — dedi qalalyq «Baqytty otbasy» ortalyǵynyń jetekshisi Zýlfııa Baısaqova.

Sonymen qatar, Naýryzbaı aýdandyq ortalyǵynyń basshysy Jandaı Sana eriktilerdi tartýdyń mańyzdylyǵyn atap ótti.

«2020 jyl Qazaqstanda eriktiler jyly bolyp jarııalandy. Bizdiń jumysymyzda volonterlerdiń kómegi óte mańyzdy. Naýryzbaı aýdanynda «Volonterlar lıgasymen» kelisim bar, sondyqtan olar bizdiń jobaǵa óz úlesterin qosady»,– dedi baspasóz máslıhaty barysynda Jandaı Sana.

Sondaı-aq ol joǵary oqý oryndarynyń stýdentteri men «Nazarbaev Zııatkerlik mektebiniń» túlekteri de , balalardy oqytýǵa kómektesýge nıetti tilge tıek etti.