Almatyda «Baqytty otbasy» ortalyqtary ákelerge de kómek kórsetedi
Almatyda az qamtylǵan otbasylarǵa jan-jaqty kómek kórsetý maqsatynda, 2019 jyldan beri qalanyń ár aýdanynda «bir tereze» qaǵıdaty boıynsha «Baqytty Otbasy» ortalyqtary jumys atqaryp keledi. Búgingi kúni qalanyń ár aýdanynda 9 ortalyq jumys istep tur.
Almatydaǵy «Baqytty otbasy» áleýmettik ortalyǵy bıyldan bastap jańa formatta jumysyn bastady. Budan bylaı, kópke qol ushyn berip júrgen mamandar endi tek analar men az qamtylǵan otbasylarǵa ǵana emes, úıde eki qolǵa bir kúrek tappaı otyrǵan ákelerge de óz jobalaryn usynbaq.
«Bizdiń ortalyqtar erler úshin avtosalonǵa arnalǵan qaptar tigý men kishkentaı balalarǵa arnalǵan massaj kýrstaryn uıymdastyryp otyr. Bul salaǵa qyzyǵýshylyq tanytqandar sany kún sanap artyp keledi. Ortalyq mamandary, olardy tegin oqytyp, keıinnen kásibin bastaý úshin memleketten grant alýyna kómektesedi. Aıta keteıik, ótken jyly aýdandaǵy 1705 adam qaıtarymsyz grant alyp, búginde shaǵyn kásibin júrgizip otyr»,-deıdi Zúlfııa Baısaqova.
Ortalyqtyń maqsaty - Almaty qalasynda turatyn áleýmettik osal otbasylardyń ómir súrý sapasyn jaqsartyp, ekonomıkalyq táýelsizdigin nyǵaıtyp qana qoımaı, sonymen qatar ómirlik qıyn jaǵdaıdan shyǵýlary úshin jeke motıvatsııalaryn nyǵaıtý.
