Almatyda «Baqytty otbasy» kópbalaly otbasylar ortalyǵy ashylady
ALMATY. QazAqparat - Almaty bıligi kópbalaly, kómekke muqtaj otbasylardy qoldaýǵa baǵyttalǵan jol kartasyn qurmaq, dep habarlaıdy QazAqparat tilshisi.
Búgin «Nur Otan» partııasy bólimshesiniń kezekten tys konferentsııasy barysynda qala ákimi Baýyrjan Baıbek «Baqytty otbasy» jobasyn qolǵa alýdy tapsyrdy. Odan bólek áleýmettik turǵydan az qamtylǵan, kópbalaly otbasylardy qoldaýǵa baǵyttalǵan jol kartasyn jasaýdy buıyrdy.
Onyń aıtýynsha, muqtaj otbasylarǵa ataýly jáne áleýmettik kómek kórsetý partııanyń basty mindetteriniń biri bolyp otyr.
«Kópbalaly otbasylar zań turǵysynan da psıhologııalyq turǵydan da kómekke muqtaj bolatyny anyq. Biz olarǵa arnaıy sondaı orta qalyptastyrýymyz kerek. Ol úshin «Baqytty otbasy» ortalyǵyn qurý kerek. Bul ortalyq kópbalaly analarǵa jumysqa turý taǵy basqa kómek kórsetýmen aınalysatyn bolady. Áleýmettik turǵydan az qamtylǵan otbasylardy qoldaýǵa baǵyttalǵan keshendi model oılastyratyn ýaqyt keldi. Oǵan memleket tarapynan kórsetiletin kómek, ataýly kómek, áleýmettik tólemder, demeýshilerdiń kómegi kiretin bolady. Az ýaqytta ár otbasyǵa kirip, olardyń muqtajdyǵyna kóz jetkizip, qaıta aralap shyǵý kerek. Bul bir rettik jumys emes, bul jumystar júıeli túrinde júrgiziletin bolady», - dedi Baýyrjan Baıbek.
Qala ákimi Áleýmettik ál-aýqat jáne Strategııa men bıýdjet basqarmasyna osy máseleler boıynsha naqty usynystar jasaýdy tapsyrdy.
