Almatyda BAQ ókilderi zymyran ushyrýdaǵy saraptamalardy júrgizetin «Ǵarysh-Ekologııa» ortalyǵynyń jumysymen tanysty
ALMATY. QazAqparat - Búgin Almatyda jýrnalıster qaýymy «Ǵarysh-ekologııa» ǵylymı-zertteý ortalyǵy» RMK hımııa-analıtıkalyq zerthanasynyń qyzmetimen tanysty.
«2001 jyly qurylǵan «Infrakos-Ekos» kásiporny 2012 jyly «Ǵarysh-Ekologııa» degen jańa ataýǵa ıe boldy jáne jańa mártebe aldy. Zertteý ortalyǵynyń negizgi qyzmeti - «Baıqońyr» ǵarysh aılaǵynan ushyrylatyn zymyran-tasyǵyshtardyń ushyrylymdaryn ekologııalyq jaǵynan súıemeldeý, sondaı-aq zymyran-tasyǵyshtardyń bólshekteri qulaǵan aýmaqta zertteý jumystaryn júrgizý. Biz Qazaqstan tarapynan tehnogendik apat oryn alǵan aýmaqta ekologııalyq jáne áleýmettik-gıgıenalyq monıtorıng baǵdarlamasyn júzege asyramyz», - dedi kásiporynnyń bas dırektory, tehnıka ǵylymdarynyń doktory Jaılaýbaı Jubatov.
Ol sonymen qatar, Almatydaǵy jalǵyz zerthananyń qorshaǵan ortada zymyran otyny komponentteriniń bolý-bolmaýyna qatysty jedel saraptama júrgizýge múmkindik bermegendigin jetkizdi. Óıtkeni, topyraq synamalaryn jetkizý eki táýlik ýaqytty alady.
«Zymyran-tasyǵyshtardyń iri apattarynan keıin, 2010 jyly Jezqazǵan men Baıqońyr qalalarynda dál osyndaı zerthanalar ashyldy. Sondaı-aq, bizdiń qaramaǵymyzda eki júk kóliginde ornalasqan kóshpeli zerthanalarymyz bar. Olar bizge dalalyq jaǵdaıda der kezinde zertteýler júrgizýge múmkindik beredi. Búginde barlyq zerthanalarymyz zamanaýı jabdyqtarmen jabdyqtalǵan. Olardyń ishinde suıyq jáne gazdyq hromatografııalyq ekspres-analızatorlar bar. Biz derekterdi ǵaryshtyq baılanys arqyly jetkize alamyz», - dedi J. Jubatov.
Kásiporyn 2010 jyldan beri 74 zymyran-tasyǵyshtyń ushyrylýyna ekologııalyq súıemeldeý jasaǵan. Bul jerde árbir jaǵdaıda ǵarysh aılaǵynyń aýmaǵy men zymyrannan bólinetin bólshekter qulaǵan aımaqta aýanyń, jerdiń jáne ósimdikterdiń hımııalyq lastaný deńgeıine qatysty baqylaý júrgizildi.
«Kásiporynda ekologııalyq jáne medıtsınalyq baǵdarlamalar bólimi bar. ıAǵnı biz bir mezette qorshaǵan orta men turǵyndarǵa qatysty kez-kelgen antropogendik yqpaldyń áserin zertteı alamyz. Sondaı-aq, biz basqa da ınstıtýttardyń ǵalymdaryn jumyldyra otyryp, respýblıkalyq baǵdarlama esebinen joǵary ýly zymyran otyny - geptıldiń tógilgen jerlerin ýytsyzdandyrý tehnologııasyn ázirledik. 2012 jyly patenttep, tájirıbege engizdik. Qazir Reseılik tarap zymyran otyndarynyń tógindilerin bzararsyzdandyrýǵa osy tehnologııany qoldanady. Ol joǵary nátıjege ıe», - dedi «Ǵarysh-Ekologııa» RMK bas dırektory.
Sonymen qatar, Aeroǵarysh komıteti tóraǵasynyń orynbasary Erǵazy Nurǵalıevtyń aıtýynsha, atalmysh kásiporynnyń mamandary shtattan tys jaǵdaılar oryn alǵan jerlerge alǵashqylardyń biri bolyp jetip, synamalar alyp, lastaný deńgeıin anyqtaıtyndyǵyn, sondaı-aq, apattardyń zardaptaryn joıý jumystarynyń josparlary men kólemin ázirleýge qatysyp, ýytsyzdandyrý jumystaryn baqylaıdy.
«Búgingi kezdesý adamnyń ǵaryshqa tuńǵysh ret ushýynyń 55 jyldyq mereıtoıy men QR Táýelsizdiginiń 25 jyldyq mereıtoıy qarsańynda uıymdastyryldy. Budan keıin kásiporynnyń ǵaryshtyq qyzmet salasyndaǵy jumystaryna qatysty tanystyrý sharalary turaqty túrde ótkizilip turatyn bolady», - dedi E. Nurǵalıev.
