Almatyda BAQ ókilderi arasynda bılıardtan týrnır ótip jatyr

NUR-SULTAN. QazAqparat - «31 arna» Naýryz merekesine oraı elimizdiń buqaralyq aqparat quraldary men zııaly qaýym ókilderiniń arasynda bılıardtan «Jańa eldiń kóktemi» atty respýblıkalyq týrnır ótkizdi, dep habarlaıdy QazAqparat.

Jarysqa belgili qalamgerler Ulyqbek Esdáýlet, Baqyt Bedelhan, Baýyrjan Jaqyp pen Álibek Shegebaı jáne qazaq jýrnalıstıkasynyń ardagerleri Tileýqabyl Myńjasar; Qaınar Oljaı, Arman Sqabyluly, Serik Janbolat bastaǵan 50-ge jýyq aqparat quraldarynyń ókilderi qatysty.

«31 arna» dırektory Qurmanbek Jumaǵalıdiń aıtýynsha, bul týrnır qazaq rýhanııatyna eńbegi sińgen, aqparat aıdynynda ózindik qoltańbasymen daralanǵan ardaqty aǵalarymyz ben jýrnalıstıka salasyndaǵy orta jáne qazirgi jas býyn arasynda ózara shyǵarmashylyq úndestikti bekemdeý.

«Bılıardtan «31 arna» kýbogi jýrnalıster arasynda jyl saıyn ótetin dástúrli sharaǵa aınalady. Bıyl alǵashqy týrnırimizdi «Jańa eldiń kóktemi» ataýymen uıymdastyryp otyrmyz. Bul ataý Memleket basshysy Qasym-Jomart Toqaevtyń «Jańa Qazaqstan: Jańarý men jańǵyrý joly» Joldaýymen sabaqtasyp tur. Qazir halqymyz ult bop uıysyp, memlekettigimizdi nyǵaıtýdyń jańa belesine qadam basty. Osylaısha, el tarıhynyń jańa paraǵy ashyldy. «31 arna» ujymy jańarý men jasampazdyqtyń bastaýyn «Jańa eldiń kóktemi» arqyly jetkizip, memleketimizdiń túbegeıli túrlenýin qoldaıdy»-deıdi, Qurmanbek Jumaǵalı.

Týrnırdiń júldegerleri «31 arnanyń» kýbogi jáne baǵaly syılyqtarmen marapattalady. Sondaı-aq arnaýly atalym boıynsha úzdik oıynshylarǵa medal tabystalyp, arnaıy syı-sııapattarǵa ıe bolady.