Almatyda baǵdarlamalaý mektebinen 27 noýtbýk urlandy
ALMATY. QazAqparat - Almatyda Nazarbaev - Ál-Farabı dańǵyldarynyń qıylysynda ornalasqan baǵdarlamalaý mektebin tapa tal túste tonap ketkenin QazAqparat tilshisine mektep basshysy Aına Dosmahambet habarlady.
Mektep keńsesi "Sátti" bıznes ortalyǵynda ornalasqan. Munda balalar SMM jáne IT baǵdarlamalaýǵa mashyqtanady. Urlanǵan noýtbýkter jaqynda ǵana satyp alynǵan. Olardyń ishinde qoraby ashylmaǵan jańalary da bolǵan.
«Bizdiń qyzmetkerler kúndiz-túni jumys isteıdi. Belgilengen jumys ýaqyty joq. Buǵan deıin bizdiń keńsege belgisiz bireýlerdiń kelip, tún ortasynda oqý aqysyn suraıtyny kúdik týǵyzatyn. Tipti keıbiri kabınetten shatasyp, kirip ketkenin aıtqanda bizdiń keńseni áldekimderdiń torýyldap júrgeni oıymyzǵa da kelmepti. Al urlyq bolǵan kúni tańǵa deıin otyryp, kúndiz úıdi-úıimizge taradyq. Tústen keıin saǵat 5-te kelip, keńsege ury túskenin kórdik», - dedi Aına Dosmahambet.
Onyń aıtýynsha, qoldy bolǵan noýtbýkterdiń jalpy quny 27 myń AQSh dollaryn quraıdy. Bolǵan jaǵdaıdan keıin mekteptiń negizin qalaýshy Samat Iskazıev jergilikti aýdandyq ІІB-ge aryz jazǵan.
«Kameradan 3 adamnyń ǵımaratqa syrt kıimderin qoldaryna ustap kirgeni kórinip tur. Kýrtkalarynyń astynda rıýkzak bolǵan. Tym jaqsy kıingen, jap-jas jigitter ekeni anyq kórinedi. Túr-álpetin de jasyrmaǵan, eshteńeden qoryqpaıtyny kórinip tur. Keńseniń esigin buzbaı, balkonnan kirgen. Dál osy kúni, osy ýaqytta bul ǵımaratta taǵy bir keńse tonalyp, 5 kompıýter urlanǵan. Qylmys tynysh aýdanda, saǵat 3-tiń kezinde bolǵan. Aryzda biz 19 noýtbýk urlanǵanyn jazdyq. Artynan taǵy 8 noýtbýktyń jetispeıtinin bildik. Olar «oljalaryn» arqalap bara jatqanda, ǵımarat kúzetshileri basqa jaqqa alańdap, bireýge júk kóterisýge kómektesip jatqan», - deıdi mekteptiń basshysy.
Almaty ІІD málimetinshe, oqıǵaǵa qatysty qylmystyq is qozǵalǵan.
«1 qyrkúıek kúni Medeý aýdandyq ІІB-ne bıznes ortalyqtyń birinen noýtbýk urlanǵany týraly aryz túsken. Olardyń sany - 19 . Qylmystyq iske baılanysty QR QK 188-baby boıynsha sotqa deıin tergeý bastaldy. Polıtseıler beınebaqylaýdaǵy jazbany alyp, mindetterine kirisip ketti. Qazir krımınaldy polıtsııa istiń mán-jaıyn anyqtaý ústinde. Keshendi shara qoldanylyp jatyr», - dedi Almaty ІІD-niń resmı ókili Saltanat Ázirbek.
Aıta ketý kerek, QR QK 188-babyna sáıkes urlyq jasaǵan qylmyskerdiń múlki tárkilenip, úsh myń aılyq eseptik kórsetkishke deıingi mólsherde aıyppul salynady nemese sol mólsherde túzeý jumystaryna jegiledi. Bolmasa, bes jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.
