Almatyda baǵany ósirgen dárihananyń lıtsenzııasy toqtatyldy
ALMATY. QazAqparat – Almatyda farmatsevtıkalyq qyzmet erejeleri men dári-dármekterdiń aınalymy salasyn buzǵany úshin bir dárihana jabyldy, dep habarlaıdy QazAqparat tilshisi.
Almaty qalasynyń mamandandyrylǵan aýdanaralyq ákimshilik sotynda farmatsevtıkalyq qyzmetpen aınalysatyn JShS-ǵa qatysty ákimshilik is qaraldy.
«Ákimshilik quqyq buzýshylyq kodeksiniń 426-babynyń 1-bóligi boıynsha ákimshilik jaýapkershilikke tartylǵan «A» JShS osy jyly dári-dármekti belgilengen shekti baǵasynan birneshe ret asyryp satqan. Seriktestik QR Densaýlyq saqtaý mınıstriniń 2019 jylǵy 15 shildedegi «Bólshek jáne kóterme saýdada ótkizýge arnalǵan preparattyń saýda ataýynyń shekti baǵalaryn bekitý týraly» № QR DSM-104 buıryǵyn buza otyryp, «Kardıomagnıl» №100 preparatynyń 150 mg 2115 teńge baǵasymen satqan. Bul fakti 2020 jylǵy 28 shildedegi reıdtik tekserý kezinde anyqtaldy», - delingen habarlamada.
«A» JShS «Ákimshilik quqyq buzýshylyq týraly» QR Kodeksiniń 426-babynyń 2-bóligi boıynsha ákimshilik jaýapkershilikke tartylyp, farmatsevtıkalyq qyzmettik lıtsenzııasyn 1 aı merzimge toqtata turý túrindegi ákimshilik jazaǵa tartyldy.
Sot qaýlysy zańdy kúshine engen joq.
