Almatyda «Babalardyń óshpes erligi jáne Qazaqstannyń kemel bolashaǵy» atty respýblıkalyq konferentsııa ótip jatyr
dep habarlaıdy QazAqparat.
QR Bilim jáne ǵylym mınıstrliginiń qoldaýymen ótip jatqan konferentsııada Elbasynyń Qazaqstan halqyna arnalǵan Joldaýynyń negizgi tujyrymdary jáne Joldaýda kórsetilgen Uly Otan soǵysynyń 65 jyldyq mereıtoıyn keshendi túrde atap ótýdegi mindetter, elimizdegi patrıottyq tárbıeniń búgingi jaǵdaıy men ahýaly talqylanýda.
Respýblıkalyq ǵylymı-tájirıbelik konferentsııa «Batyr Baýyrjanǵa taǵzym» atty kórmeniń ashylý saltanatymen bastaldy. Kórmeni QR eńbek sińirgen qaıratkeri, polkovnık Kım Serikbaev pen Aýǵanstan soǵys ardagerleri qoǵamy tóraǵasynyń orynbasary Baqytbek Smaǵulov ashty.
«Bul is-sharalar halqymyzdyń qaharmany, eldigimizd pash etken Baýyrjan Momyshulynyń rýhyna taǵzym etýge, sonymen qatar Uly Otan soǵysy ardagerlerine degen qurmetimizdi kórsetýge arnalǵan. Elbasy bul oraıda, Joldaýda «Uly Otan soǵysynyń jeńisi - bul barlyǵymyzdyń ortaq tarıhymyz jáne bul mańyzdy kún» dep atap ótken bolatyn. Biz sol negizde búgingi jıyndy, ásirese tárbıe salasyndaǵy patrıottyq máseleni kóterýge arnap otyrmyz», dedi T.Júrgenov atyndaǵy Qazaq ulttyq óner akademııasynyń tárbıe jáne áleýmettik máseleler jónindegi prorektory, professor Qudaıbergen Bolatbaev. Onyń aıtýynsha, elimizdiń JOO-lary maman daıyndaýmen qatar, jastarymyzdyń patrıottyq rýhta tárbıelenip ósýine mán berýi kerek. Konferentsııa barysynda Uly Otan soǵysynyń ardagerleri, áskerı qoǵamdyq uıymdardyń ókilderi, ǵalymdar, jazýshylar Uly Jeńis pen jas urpaqqa patrıottyq tárbıe berý máseleleri týraly sóz qozǵady.
Konferentsııa Qazaqtyń Memlekettik Abaı atyndaǵy akademııalyq opera jáne balet teatrynda Keńes Odaǵynyń Batyry, Qazaqstannyń halyq qaharmany, jazýshy Baýyrjan Momyshulynyń - 100 jyldyq, Uly Otan soǵysy jeńisiniń 65 jyldyq mereıtoılaryna arnalǵan «Baýyrjan Momyshulynyń rýhyna taǵzym» atty mádenı is-sharamen jalǵasady. Kontserttik baǵdarlamada Baýyrjan Momyshulynyń beınesi somdalyp, sahnalyq qoıylymdar kórsetiledi, sonymen qatar patrıottyq ánder shyrqalatyn bolady.
