Almatyda «Babalar ańsaǵan Táýelsizdik» atty ulttyq baıqaý bastaldy
ALMATY. QazAqparat - Búgin Á.Qasteev atyndaǵy QR Memlekettik óner murajaıy tarıhı janrdaǵy beıneleý óneri boıynsha «Babalar ańsaǵan Táýelsizdik» atty ulttyq baıqaýdyń bastalǵandyǵyn jarııalady.
«Biz murajaı qorynda qazaq halqynyń tarıhyn beıneleıtin týyndylardyń jetkiliksiz ekendigin túsindik. Kez-kelgen taqyryptyń kórkemdik-beınelik turǵyda kórsetilýi urpaqty ultjandylyq rýhta tárbıelýde úlken mańyzǵa ıe. Sondyqtan, tarıhı janr - óner salasyndaǵy óte bir kúrdeli janrlardyń biri. Bul jerde kóptegen materıaldardy zertteýge, zerdeleýge týra keledi. Sol úshin de bul baıqaý osy janrdyń damýyna serpin beredi degen úmittemin», - dedi baspasóz máslıhaty barysynda mýzeı dırektory Gúlmıra Shalabaeva.
Óz kezeginde murajaı dırektorynyń ǵylym boıynsha orynbasary Evfrat Mambekov Qazaqstannyń qazirgi zamanǵy ónerinde úırenshikti, daǵdyly obrazdar qalyptasqandyǵyn jáne sıýjetterdiń az ekendigin aıtty.
«Menińshe, bul baıqaý jańa dramalyq sıpatqa ıe obrazdar men ata-babalarymyz qatysqan tarıhı oqıǵalardyń kórkemdik beınesiniń qalyptasýyna septigin tıgizedi. Sondyqtan da baıqýdyń maqsaty - mańyzdy tarıhı oqıǵalar men tulǵalardy kórkemdik-beınelik turǵyda zerdeleý jáne olardy berý tásilderi arqyly patrıottyq tárbıege yqpal etý. Sondaı-aq, sýretshiler arasynda báseke týdyryp, beıneleý óneri sheberleriniń kásibı kórkemdik deńgeıin kóterip, jetildirý », - dedi E. Mambekov.
Baıqaýǵa sýretshiler de músinshiler de qatysa alady. Baıqaý sharty boıynsha týyndylarda qazaq halqynyń tarıhynda 20-shy ǵasyrdyń basyna deıin oryn alǵan naqty tarıhı oqıǵalar kórinis tabýy tıis. Bul jerde asa kóp aıtylmaı kelgen oqıǵalarǵa basa mán beriledi.
Sondaı-aq, baıqaý sharttary Á.Qasteev atyndaǵy murajaıdyń saıtynda jarııalanady. Baıqaý 2016 jyldyń 15-shi jeltoqsanynda Á.Qasteev atyndaǵy QR Memlekettik óner murajaıynyń zaldarynda uıymdastyrylatyn Qazaqstan Táýelsizdiginiń 25 jyldyǵyna arnalǵan kórmemen aıaqtalady.
