Almatyda B. Eıfmannyń «Krasnaıa Jızel» baletiniń tuńǵysh qazaqstandyq kórsetilimi ótedi
ASTANA. Qazannyń 19-y. QazAqparat /Marlan Jıembaı/ - Qazannyń 20-21-i kúnderi Almatydaǵy Abaı atyndaǵy Qazaq memlekettik akademııalyq opera jáne balet teatrynda P. Chaıkovskıı, A. Shnıtke, J. Bızeniń mýzykasyna jazylǵan Borıs Eıfmannyń «Qyzyl Jızel» baletiniń tuńǵysh qazaqstandyq kórsetilimi ótedi.
Mádenıet mınıstrliginiń málimetinshe, qoıylym uly orys balerınasy Olga Spesıvtsevanyń ónerdegi qysqa da jarqyn ómirine arnalǵan. Avtor uly balerınanyń taǵdyryn kórsete otyryp, klassıkalyq ekzersısten avangardqa deıingi, serýen bıinen joǵary psıhologızmge deıingi HH ǵasyr bı óneriniń tarıhyn baıandaıdy.
«Zamanymyzdyń kórnekti baletmeısteri, Reseıdiń halyq ártisi, Memlekettik syılyqtyń laýreaty Borıs Eıfman (Sankt-Peterbor q.) osy álemge áıgili baletti Abaı atyndaǵy opera jáne balet teatrynyń sahnasynda qoıady», delingen mınıstrliktiń taratqan habarlamasynda.
Basty partııalarda - QR eńbek sińirgen qaıratkerleri Sáýle Rahmedova, Quralaı Sarqytbaeva, Dmıtrıı Sýshkov, balet solısteri Farhad Býrıev, Ámir Jeksenbek. Qoıýshy-sýretshi - Martın Vılkarsıs (Rıga q.) jáne baletmeısterdiń kómekshileri - Alına Solonskaıa, Sergeı Zımın (Sankt-Peterbor q.). «Krasnaıa Jızel» baletiniń Astanadaǵy tusaýkeseri 2010 jylǵy 12 qarashada Beıbitshilik jáne kelisim saraıynda ótedi
