Almatyda azyq-túliktik emes bazarlar 1 maýsymnan ashylýy múmkin
ALMATY. QazAqparat - Almatyda azyq-túliktik emes bazarlardyń jumysy 1 maýsymnan bastap ashylmaq. Bul týraly búgin onlaın brıfıng barysynda qalalyq Kásipkerlik jáne ınvestıtsııalar basqarmasynyń basshysy Erkebulan Orazalın aıtty, dep habarlaıdy QazAqparat tilshisi.
Buǵan deıin qala ákimdigi Saýda úıleri, Saýda ortalyqtarynyń 25 mamyrdan bastap ashylatynyn habarlaǵan bolatyn .
«Barlyq bazarlar bir mezette ashylady degen sóz emes. Azyq túliktik emes bazarlarǵa kelsek, olardyń kópshiligi sanıtarlyq normalardy oryndaǵan jaǵdaıda ǵana ashylady. Komıssııa sheshimine sáıkes, mundaı nysandar aýdıtten ótken soń 1 maýsymnan bastap ashylýy múmkin. Nysandardy ashý olardyń ázirligine mindetti baǵalaý júrgizilgennen keıin ǵana múmkin bolady», - dedi basqarma basshysy Erkebulan Orazalın.
Budan buryn jabylǵan bazarlardyń qyzmetine qoıylǵan shekteýlerdi alý kezeń-kezeńmen júrgiziletin bolady.
2020 jylǵy 25 mamyrdan bastap, bosańsýdyń kezekti kezeńiniń sheńberinde, qalada barlyq Halyqqa qyzmet kórsetý ortalyqtarynyń, sondaı-aq budan buryn jabylǵan azyq-túlik bazarlary men ámbebap bazarlary azyq-túlik qatarlarynyń, sanıtarııalyq-epıdemıologııalyq normalarǵa sáıkes kelgen jaǵdaıda, olardyń qyzmetine qoıylǵan shekteýlerdi alý josparlanyp otyr.
Shekteýler alynǵannan keıin 5 arnaıy HQKO, 2 Mıgratsııalyq qyzmet kórsetý ortalyǵyn jáne 2 Tsıfrlyq qyzmet kórsetý ortalyǵyn qosa alǵanda 16 front-ofıstiń qyzmeti qaıta bastalady. Onyń arqasynda 1600 astam adam, onyń ishinde, klıenttermen tikeleı baılanysta jumys isteıtin 933 front-ofıs qyzmetkeri jumysqa oralady dep boljanyp otyr.
Baǵalaý júrgizýge beriletin tapsyrys kún saıyn sall-centre (+7 775 882 55 39, +7 775 882 57 08, +7 775 882 55 46, +7 775 882 54 16, +7 775 882 56 02, +7 775 882 53 12, +7 775 882 56 49, +7 775 882 52 00, +7 775 882 56 72, +7 775 882 53 92), sondaı-aq elektrondyq poshta (nysandardyń ornalasý oryndary boıynsha: Infoalmaly@mail.kz – Almaly aýdany, Infoauezov@mail.kz – Áýezov aýdany, Infobostandyk@mail.kz – Bostandyq aýdany, Infozhetysu@mail.kz – Jetisý aýdany, Infonauryzbay@mail.kz – Naýryzbaı aýdany, Infoturksib@mail.kz – Túrksib aýdany) arqyly qabyldanady.
Oblysta turatyn qyzmetkerlerge qalaǵa kirýge jáne qaladan shyǵýǵa ruqsat berildi. Qalaǵa kirýdiń mindetti sharty olardyń derekterin almaty.infokazakhstan.kz. bazasyna engizý bolyp tabylady. Nysandardy tirkeý olar jumysqa barýǵa ruqsat alǵannan keıin múmkin bolady.
18 mamyrdan bastap qandaı nysandar ashylǵanyn habarlaǵan bolatynbyz.
