Almatyda azyq-túlik salasyndaǵy aıqyn jetistikterdi sıpattaıtyn kórme ótedi

; ALMATY. Sáýirdiń 5-i. QazAqparat /Názıra Eleýhan/ - Búgin Almatyda sáýir aıynyń 7-i men 9-y kúni aralyǵynda ótetin 12-shi dástúrli «Qazaqstan azyq-túlik naryǵy - 2010», «Táttiler», «Sharap», «Qural-jabdyq. Ydys. Qaptarma-2010», «Agroteh -2010» halyqaralyq kórmesine arnalǵan baspasóz máslıhaty bolyp ótti,

dep habarlaıdy QazAqparat.

«Azyq-túlik salasyndaǵy otandyq taýar óndirýshileriniń básekege qabilettilik deńgeıin kórsetý, qaýipsiz, sapaly taǵam ónimderin alǵa tartý, jańa qyzmet túrlerimen tanystyrý, otandyq ónim ótkizilimi naryǵyn keńeıtý, ǵylym men óndiris baılanysyn nyǵaıtý maqsatyna arnalǵan kórmeni mindetti túrde jyl saıyn ótkizýdi dástúrge aınaldyrdyq. Kórme tek ǵana tutynýshylarymyzǵa jańa ónimderimizdi, jańa tehnologııalarymyzdy, qyzmet túrlerin tanystyryp ǵana qoımaı, kórmeden kórmege deıin jetken jetistikterimizdi, bizdiń jáne halyqaralyq naryqtaǵy jańalyqtarmen bólisýge, sondaı-aq tamaq jáne óńdeý ónerkásibindegi ortaq máselelerdi sheshýge múmkindik beredi», dedi Qazaqstannyń tamaq jáne óńdeý ónerkásibi taýar óndirýshiler Odaǵynyń prezıdenti, «Rahat» AQ-nyń prezıdenti Anatolıı Popelıýshko. Onyń aıtýynsha bıylǵy jyly, shilde aıynyń 1-nen engiziletin jańa Kedendik kodeks, kásipkerlerge ózindik jaǵymdy jaǵymen, Reseı men Belarýstyń naryǵyn ıgerýge, erkin saýda jasaýǵa, naryǵyn keńeıtýge múmkindik beredi.

Qazaqstannyń Tamaq jáne óńdeý ónerkásibi taýar óndirýshiler odaǵynyń vıtse-prezıdenti Nına Bezrýkovanyń aıtýynsha, kórme aıasynda ótetin "Qazaqstan azyq-túlik naryǵy kóshbasshysy 2010" baıqaýyna 65 kásiporyn qatysýǵa usynys bildirgen. «Ótken jylǵy baıqaý qorytyndysy boıynsha biz óz ónimderimizdiń sapasy jyldan jylǵa jaqsaryp kele jatqanyn baıqadyq. Bıyl baıqaýǵa et ónimderin óńdeıtin kásiporyndar, sút ónimderin shyǵaratyn kompanııalar kóp qatysaıyn dep jatyr. Al, maı ónimderin shyǵaratyn kompanııalar ókinishke qaraı az. Soǵan qaraǵanda, olar naryqta ózderin senimsiz ustaıtyn sııaqty», dedi Nına Bezrýkova. Ol sonymen qatar, «Qazaqstannyń azyq-túlik qaýipsizdigi bul - densaýlyq, halyq ómiriniń joǵary sapasy» atty dóńgelek ústel otyrysyna reseılikter qatysýǵa usynys bildirdi, dedi.

Dástúrli túrde qatysyp kele jatqan Almaty tehnologııa jáne menedjment kolledjiniń dırektory Nasymjan Ospanova: «Bizdiń stýdentter bul sharaǵa jyl saıyn qatyssa da, ár jolǵy qatysýymyzdyń mańyzy zor», dep atap ótip, «kórme bizdiń stýdentterge tájirıbe jınaqtaýǵa, jańa tehnologııalarmen tanysýǵa múmkindik beredi, al, ártúrli ónimge arnalǵan taqyryptar boıynsha ótetin sheberlik - dárister men kezdesýlerdiń paıdasy biz úshin óte kóp», dedi.