Almatyda azyq-túlik baǵasyn turaqtandyrýǵa 9 mlrd teńge jumsalady

ALMATY. QazAqparat - Almaty ákimi Baqytjan Saǵyntaevtyń tóraǵalyq etýimen ótken jumys keńesi barysynda azyq-túlik qaýipsizdigi jáne áleýmettik mańyzy bar azyq-túlik ónimderiniń baǵalaryn ustap turý máseleleri talqylandy, dep habarlaıdy QazAqparat tilshisi.

Almatyda áleýmettik mańyzy bar azyq-túlik taýarlarynyń baǵasyn turaqtandyrý úshin shamamen 9 mıllıard teńge jumsalatyn bolady. Bul qarjyny retteý tetikterin iske asyrýǵa, onyń ishinde qalanyń saýda júıelerinde kelisilgen baǵamen satylatyn taýarlar jelisin ulǵaıtýǵa arnalǵan.

Búginde «Magným» saýda jelisimen áleýmettik mańyzy bar azyq-túlik ónimderin 10-nan 13 pozıtsııaǵa deıin ulǵaıtý jóninde kelisimder jasaldy. Oǵan qant, kúnbaǵys maıy, sıyr eti sııaqty ónimder engizildi. Sonymen qatar, jekelegen pozıtsııalar boıynsha saýda markalarynyń tizimi 10-nan 24 ataýǵa deıin ulǵaıady. Olar: kúnbaǵys maıy - 5, kúrish - 3, jumyrtqa - 2, taýyq etin satatyn 4 saýda markasyn qosý kelisildi. Bulardan ózge, kelisilgen baǵamen satylatyn ónimderdiń jalpy kólemi 8,5 myń tonnaǵa deıin artady.

«Sabyrjan Company» JShS-men jasalǵan nesıelik kelisimniń aıasynda 2021 jyldyń 1 qańtarynan bastap «Toımart» saýda jelisinde áleýmettik mańyzy bar azyq-túlik ónimderin 7-den 12 pozıtsııaǵa deıin arttyrý josparlanyp otyr. Olar - qant, kúnbaǵys maıy, pııaz, qyryqqabat jáne aıran. Saýda belgileriniń sany 7-den 15-ke deıin ósedi. Azyq-túlik ónimderiniń jalpy kólemi 1,8 myń tonnaǵa deıin ulǵaıady.

Qabyldanǵan sharalar eń aldymen qazirgi kezde suranysy artqan ónim túrlerine baǵany turaqtandyrýǵa baǵyttalǵan. Qala ákimi B. Saǵyntaev áleýmettik mańyzy bar ónimder baǵalaryna qatysty jaǵdaıdy baqylaýdy ári ónimniń kúrt qymbattaýyna jáne bazardaǵy alypsatarlyq áreketterge tosqaýyl qoıýdy tapsyrdy.

Aıta keterligi, dıstrıbıýtorlarmen jáne óndirýshilermen jalpy somasy 2,5 mıllıard teńge bolatyn «fıýcherlik» kelisimsharttar jasaý boıynsha jumystar bastaldy. Atalǵan qarjy 2021-2022 jyldardaǵy maýsym aralyǵy kezeńinde 21 myń tonna kókónisti daıyndaýǵa jumsalatyn bolady. Bul jalpy tutynýdyń 20%-yn quraıdy.

Qazirgi kezde Almaty qalasynyń azyq-túlikti Turaqtandyrý qoryna 3,3 myń tonna ónim satyp alý jumystary qosymsha pysyqtalyp jatyr. Onyń ishinde 2 myń tonna qant, 1 myń tonna kúrish jáne 0,3 tonna qaraqumyq bar.

Jalpy, jyl basynan beri Almatyda áleýmettik mańyzy bar ónimderdiń baǵa ındeksi 110,5%-dy qurady. Áleýmettik mańyzy bar ónimderdiń baǵalaryn ustap turý jónindegi jumystar qala ákimdiginiń turaqty baqylaýynda bolady.