Almatyda azyq-túlik baǵasy qalaı retteledi

ALMATY. QazAqparat - «Almaty» áleýmettik-kásipkerlik korporatsııa» AQ basqarma tóraǵasy Asqar Bilisbekov áleýmettik mańyzy bar azyq-túliktiń baǵasyn ustap turý boıynsha qabyldanǵan sharalar týraly aıtty, dep habarlaıdy QazAqparat tilshisi.

Áleýmettik-kásipkerlik korporatsııa AQ basqarma tóraǵasy Asqar Bilisbekovtyń sózine qaraǵanda, qazirgi ýaqytta ÁKK áleýmettik mańyzy bar azyq- túlik baǵasyn ustap turý úshin kúsh salýda. Atap aıtar bolsaq, nan, un, sıyr, taýyq eti men kókónis ónimderi.

«Men atqarylǵan jumystar týraly aıtqym keledi. Bizde birqatar azyq-túlikterdiń baǵasy tómendedi. Atap aıtqanda, qant (19,3%), qyryqqabat (17,2%), súzbe (7,8%), sábiz (1,7%), kúnbaǵys maıy (0,5%) tómendedi », - dedi Asqar Bilisbekov.

Onyń aıtýynsha, óndirýshi kompanııalarmen birlesken kúsh-jigerdiń arqasynda sıyr etiniń baǵasy 1900 teńge deńgeıinde saqtalýda. Búgingi kúnge deıin 100 mln astam teńgege 60 tonna et ónimderi satylǵan.

«Baǵany retteýdiń negizgi tetigi - turǵyndardyń turatyn jerindegi «demalys jármeńkeleri». Bul jármeńkelerge aıyna 240 myńnan astam adam keledi, taýar aınalymy 6 mıllıard teńgeden asady », - dedi spıker.

Ákimdik kartoptyń kelisin -145, sábizdi -162 teńge, pııaz baǵasyn -130, sondaı-aq qyryqqabatty 200 teńgeden asyrmaýdy kózdep otyr. Bul baǵalar 2020 jyldyń sáýir aıyna deıin ǵana belgilengen.

Buǵan deıin Almatyda áleýmettik nan baǵasy 2020 jyldyń 1 aqpanyna deıin kóterilmeıtini habarlanǵan bolatyn.