Almatyda azyq-túlik baǵasy qalaı aýyzdyqtalyp otyr

ALMATY. QazAqparat – Jyl basynan beri Almatyda áleýmettik mańyzy bar ónimderdiń baǵa ındeksi 109,4% bolǵan. Bul respýblıka boıynsha eń tómengi ósim bolyp esepteledi, dep habarlaıdy QazAqparat tilshisi.

Bul týraly Óńirlik kommýnıkatsııalar qyzmetinde ótken brıfıngide qalalyq Kásipkerlik jáne ınvestıtsııalar basqarmasy basshysynyń orynbasary Damır Tazabek málim etti.

«Bul kórsetkishke jedel jáne strategııalyq sharalar arqyly qol jetkizdik. Kásipkerlerge jeńildikpen beriletin boryshtar dúken sórelerindegi baǵany turaqtandyrýdyń tıimdi tetigi retinde paıdalanylyp otyr», - dedi Damır Tazabek.

Osy «aınalym» shemasy arqyly qazir qalada áleýmettik mańyzy bar azyq-túliktiń 19 túrin turaqty baǵamen satýǵa múmkindik týyp otyr.

«Magnum Cash & Carry saýda jelisine jeńildikti qaryz berý esebinen jyl sońyna deıin jalpykólemi 7,8 myń tonna bolatyn 12 túrli taýarǵa turaqty baǵa begilendi. Bul – birinshi surypty un, qaraqumyq, kúrish, makaron kespesi, kúnbaǵys, sary maı, taýyq eti, sıyr eti, sút, aıran, súzbe, qant», - dedi qalalyq Kásipkerlik jáne ınvestıtsııalar basqarmasynyń ókili.

Onyń aıtýynsha, «Toımart» saýda jelisimen de osyndaı kelisim jasalǵan. Onda jalpy salmaǵy 1,4 myń tonna bolatyn 10 túrli taýardyń turaqty baǵasy bekitilgen.

«1 mamyrdan 1 qarashaǵa deıin atalmysh saýda jelisinen bekitilgen baǵamen birinshi surypty un, nan, kúrish, makarony kespesin, kúnbaǵys jáne sary maı, taýyq eti, aıran, súzbe, tuz satyp alýǵa bolady», - deıdi ol.

Damır Tazabek belgilengen baǵalardyń mólsherine de toqtaldy. Mysaly, «Aqsaı» kásiporny jyl aıǵyna deıin nan baǵasyn 75 teńge kótermeýge kelisip otyr.

«Nannan basqa, sıyr etin, jumyrtqa men qantty óndirýshilerden tikeleı dúken sóresine jetkizý uıymdastyryldy. «Aınalym» shemasyna ózge óńirlerdegi óndirýshilerdi de tartyp jatyrmyz. Sonyń arqasynda «Alataý qus» kásiporyn taýyq etiniń bir kelisin 820 teńge dep bekitti. Osy baǵamen 1200 tonna taýyq eti jetkiziledi. Al Merki qant zaýytynan kelisi 255 teńge bolatyn 5 myń tonna qant jetkizý boıynsha jumys júrgizip jatyrmyz. Qalanyń negizgi bazarlarynda, saýda jelilerinde, sýpermarketterinde áleýmettik mańyzy bar azyq-túlik taýarlary baǵalarynyń kúndelikti monıtorıngi jalǵasýda», - dedi basqar basshysynyń orynbasary.