Almatyda az qamtylǵan otbasylarǵa 5,5 mlrd teńge bólinedi

ALMATY. QazAqparat - Almaty ákimi Baýyrjan Baıbek Memleket basshysynyń «Nur Otan» partııasynyń XVIII sezinde aıtylǵan halyqtyń az qamtylǵan tobyna, onyń ishinde kópbalaly analarǵa qoldaý kórsetý jónindegi tapsyrmasyn oryndaý týraly jospardy tanystyrdy, dep habarlaıdy QazAqparat tilshisi.

Qala basshysy ol úshin jergilikti bıýdjetten 5,5 mlrd teńgeden astam qarjy bólinetinin atap ótti.

«Memleket basshysy atap ótkendeı, árbir qazaqstandyq otbasy reforma nátıjesin bolashaqta emes, dál qazir sezinýleri tıis. Az qamtylǵan azamattardyń tabysyn kóterý, baspanaǵa, sapaly bilim men densaýlyqqa qoljetkizýleri jáne óńirlerdi damytý úshin Prezıdent qosymsha 2 trln teńge bólýdi tapsyrdy. Prezıdent alǵa qoıǵan áleýmettik máselelerdi sapaly oryndaý úshin Almatyda naqtyly sharalar jospary, onyń ishinde «Baqytty otbasy» qalalyq áleýmettik baǵdarlamasy jasaldy. Atap aıtqanda, jeńildetilgen turǵyn úı ıpotekasy, oqýshylar men stýdetterdiń stıpendııasy, áleýmettik jáne bir rettik tólemder, jumyspen qamtý boıynsha kómek kórsetiledi. Jalpy, halyqtyń az qamtylǵan tobyna, onyń ishinde kópbalaly otbasylarǵa keshendi qoldaý kórsetý úshin 5,5 mlrd teńgeden astam qarjy bólinedi», - dedi Baýyrjan Baıbek.