Almatyda Áıteke bı kóshesi uzartylady

ALMATY. QazAqparat – Maýsym aıynda Almaty ákimdigi Baıtursynov pen Dosmuhamedov kósheleriniń arasyndaǵy Áıteke bı kóshesiniń boıyna trotýar ornatyp, joldy uzartýdy bastaýdy josparlap otyr. Bul týraly qala ákimi Erbolat Dosaev Almaly aýdanynyń turǵyndarymen kezdesýde aıtty, dep habarlaıdy QazAqparat tilshisi.

Shahar basshysynyń sózinshe, jyl basynan beri qadamdyq qoljetimdilikti qamtamasyz etý úshin Brýsılovskıı jáne Baıtursynov kóshelerinde 4 jańa aıaldama ornatyldy.

«Jyl sońyna deıin Muqanov, Baızaqov, Tilendıev jáne Panfılov kóshelerine taǵy 4 aıaldama ornatý kózdelgen. Budan bólek, maýsym aıynda Baıtursynov pen Dosmuhamedov kósheleriniń arasyndaǵy Áıteke bı kóshesiniń boıyna trotýar ornatyp, joldy uzartýdy bastaımyz»,- dedi Erbolat Dosaev.

Sonymen qatar, bıyl aýdandyq mańyzy bar 11 kósheni jáne jalpy uzyndyǵy 25 km bolatyn 5 magıstraldy kóshege ortasha jóndeý jumystary júrgiziledi.

«Bul maqsatqa jergilikti bıýdjetten 4,3 mlrd teńge bólindi. Abaı dańǵyly – Tilendıev kóshesinen Dostyq dańǵylyna deıin, Baızaqov kóshesi – Tımırıazev kóshesinen Raıymbek dańǵylyna deıin jáne taǵy basqa kósheler qamtylady»,- dedi qala ákimi.