Almatyda áıgili ıtalıandyq ánshiniń kontserti ótpek
ALMATY. QazAqparat - Almatyda alǵash ret álemge tanymal ıtalıandyq ánshi PUPO óner kórsetpek. Onyń kontserti 3 mamyrda Respýblıka saraıynda ótedi. Kórermender onyń San-Remo festıvalinde ondaǵan jyldar boıy shyrqaǵan úzdik ánderin tamashalaıdy, dep habarlady qalalyq Mádenıet basqarmasynyń baspasóz qyzmetinen.
PUPO-ny Almatyǵa shaqyrýǵa Qazaqstandaǵy ıtalıandyq jas ánshi Tonı Týrı muryndyq boldy, ol osy biregeı sharany óziniń «Italııa-Qazaqstan» halyqaralyq jobasy sheńberinde uıymdastyrdy. PUPO kontserti T.Týrıdiń Qazaqstandaǵy ekinshi iri mýzykalyq is-sharasyna aınalmaq. Budan buryn ol 4-5 sáýirde Atyraýda ıtalıandyq juldyz, ánshi Guerino Papa qatysýymen tamasha kontsert uıymdastyrǵan bolatyn.
Aıta keteıik, bul kontsertke Guerino Papa, Kúmis Bazarbaeva, «Earth Kazakhst» arýy sııaqty qonaqtar qatysady. Al Tonı Týrı alǵash ret sahna tórinde qazaqtyń halyq áni «Balqadıshanyń» ıtalıandyq nusqasyn áýeletpek.
PUPO-nyń shyn esimi Enzo Ghinazzi, ol ıtalıandyq eń tanymal ánderdiń avtorlarynyń biri. Sahnadaǵy óner jolynda kóptegen albomdar jazǵan onyń 11-i altyn ıelense, álem boıynsha 20 mln. astam jazbalary satylǵan. Ol sondaı-aq Nıý-Iorktegi Bordveıde «Madison Square Garden», Torontodaǵy «Maple Leaf Garden», Londonda «Royal Albert Hall», Parıjde «Entertainment Center of Sydney» jáne Olympia» syndy álemdegi tanymal teatrlarda óner kórsetken.
