Almatyda áıgili dırıjer Alan Bóribaev týraly eki derekti fılmniń tusaýy kesildi
ALMATY. QazAqparat- Búgin Almatyda TOLTÝMA kınokompanııasy men Sh. Aımanov atyndaǵy «Qazaqfılm» kınostýdııasy áıgili qazaqstandyq dırıjer Alan Bóribaev jaıyndaǵy eki derekti fılmniń tanystyrylymyn ótkizdi. Eki fılmdi de rejısser Ermek Shynarbaev túsirgen.
Esterińizge sala ketelik, qazir elimizde QR Prezıdenti Nursultan Nazarbaevtyń tapsyrmasymen QR Mádenıet jáne sport mınıstrligi jas táýelsiz Qazaqstandy búkil álemge tanytyp júrgen ataqty tulǵalar jaıynda derekti fılmder serııasyn túsirip jatyr.
Sondaı tulǵalardyń qatarynda álemdegi eń tanymal jas dırıjerlerdiń biri - Alan Bóribaev ta bar. Ol álem boıynsha áıgili orkestrlermen jumys istegen. Alannyń jetekshiligimen ázirlengen mýzykalyq týyndylar álemge belgili teatrlarda qoıyldy.
«Alan Bóribaev, Karmen» jáne «Abaı» derekti fılmderi kórermenderge «Karmen» jáne «Abaı» operalaryn qoıý jumystarynyń qalaı júrgizilgendigi týraly syr shertedi.
Fılmdi jasaýshylardyń aıtýynsha, fılmdi túsirýdegi basty maqsat - kórermenderdi mýzykanttyń shyǵarmashylyǵymen ǵana tanystyrý emes, onyń mýzyka salasyndaǵy jolynyń qupııasyn ashý bolǵan.
«Bul eki fılm men týraly buǵan deıingi túsirilgen kıno týyndylardan erekshe. Ermek Shynarbaev - óte daryndy adam, tamasha rejısser. Ol bul fılmderdi óz kózqarasymen, óz ustanymymen túsirdi. Negizinen, túsirý jumystarynyń kóbisi Almatyda júrgizildi. Ol bir-birine uqsamaıtyn eki fılmdi dúnıege ákeldi. Eń bastysy, ol dırıjer mamandyǵynyń túpki mán-maǵynasyn berýge tyrysty. Óıtkeni, rejısserlardyń barlyǵy birdeı dırıjerdiń shyn mánisinde nemen aınalysatynyn túsine bermeıdi. Al Ermek repetıtsııalyq úderister men kórsetilimderdiń barlyǵyn túsirip shyqty. Repetıtsııa barysynda meniń ártister men orkestrge qoıǵan talaptarym Ermek izdegen materıaldardyń jelisine aınaldy», - dedi fılmderdiń bas keıipkeri, dırıjer Alan Bóribaev. 
