Almatyda áıgili balalar dárigerleri bas qospaq
ALMATY. QazAqparat - Almatyda Pedıatrııa jáne balalar hırýrgııasy ortalyǵynyń ashylǵanyna 85 jyl tolýyna oraı saltanatty jıyn ótedi. Onda balalar densaýlyǵyna qatysty ózekti taqyryptar talqylanbaq, dep habarlaıdy QazAqparat tilshisi.
Qazaq balalar hırýrgııasynyń atasy Kamal Ormantaev, akademık Tóregeldi Sharmanov, medıtsına ǵylymdarynyń doktory, professor Tamara Chývakova syndy tanymal dárigerler qatysatyn jıynda pedıatrııa jáne balalar hırýrgııasy ǵylymı ortalyǵynyń ótkeni men búgini, jetistigi men damýy, elimizdegi pedıatrııalyq qyzmettiń baǵyt-baǵdary saralanbaq.
Saltanatty jıyn aıasynda konferentsııa ótip, pedıatrııanyń ózekti máseleleri, onkologııalyq, gematologııalyq kómek berýdi uıymdastyrý, zerthanalyq qyzmettiń, balalar kardıohırýrgııasy qyzmetiniń damýy, onkologııalyq aýrýlarǵa shaldyqqan balalardy ońaltýdyń búgingi jaǵdaıy syndy balalardy emdeýdegi ózekti meseleler talqylanady.
Mereıtoılyq sharaǵa ana men bala saýlyǵyna ólsheýsiz úles qosqan ardager-dárigerler, ortalyqtyń seriktesteri men áriptes-dostary, qazaqstandyq medıtsınalyq mekemelerdiń basshylary, Pedıatrııa ortalyǵy ujymy men basshylyǵy qatysady.
Shara aıasynda ortalyqta uzaq jyldar qyzmet atqarǵan, el bolashaǵy-balalar men nárestelerdi emdep, ult densaýlyǵyn jaqsartýǵa ólsheýsiz úles qosqan ardager-dárigerlerdi marapattaý rásimi ótedi.
Aıta keteıik, Pedıatrııa jáne balalar hırýrgııasy ortalyǵynyń negizi 1932 jyly 28 qarashada Ana men bala densaýlyǵyn qorǵaý ǵylymı zertteý ınstıtýty retinde qalanǵan. Atalǵan ortalyq balalardyń densaýlyǵyn qorǵaýda qol jetkizgen jetistikteri úshin Halyqtar Dostyǵy ordenimen jáne «Sapa úshin Eýropalyq Gran Prı» halyqaralyq baıqaýynyń «Medıtsına salasynyń kóshbasshysy» Bas júldesimen marapattalǵan. Saltanatty shara 27 qazan kúni «Pedıatrııa jáne balalar hırýrgııasy ǵylymı ortalyǵynda ótedi.
