Almatyda aıǵaq zattardy urlaǵan tergeýshi 10 jylǵa sottaldy
Almaly aýdandyq sotynda QR QK-niń 189-baby 4-bóliginiń 2-tarmaǵy boıynsha aıyp taǵylǵan Almaty qalalyq Memlekettik kirister departamenti ekonomıkalyq tergeýler qyzmetiniń burynǵy tergeýshisi Qýandyq Esenǵulovqa, sondaı-aq QR QK-niń 28-baby 5-bóligimen, 189-babynyń 4-bóligi, 2-tarmaǵymen aıyptalǵan Rýstam Ótegenovke úkim shyqty.
«Іs materıaldaryna sáıkes, Qýandyq Esenǵulov kontrabandalyq qylmys boıynsha quny 4 mln 17 myń teńgege baǵalanǵan zergerlik zattar men 1 myń 670 AQSh dollaryn aıǵaqty zat retinde tárkilep alǵan. Keıin olardyń aıǵaqty zat ekendigin dáleldeıtin qujattar men beınekameralardaǵy taspany joıyp jibergen. Osylaısha, aıǵaqty zattardy Memlekettik kirister departamentiniń ekonomıkalyq tekserý qyzmetiniń saqtaý kamerasyna jetkizbegen. Rýstam Ótegenov Esenǵulovtyń aıtýymen barlyq zattardy Almatydaǵy lombardtarǵa ótkizgen. Eki kúdikti altyn satýdan túsken 4 mln 594 myń teńgeni óz qajettilikterine jaratqan. Saldarynan qalalyq Memlekettik kirister departamentine 344 594 000 teńge kóleminde nuqsan keltirildi», - dedi qalalyq sottyń baspasóz qyzmetinen.
Sot úkimimen «asa iri kólemde senip tapsyrylǵan ózgeniń múlkin qoldy etken» Q.Esenǵulov 10 jylǵa sottaldy. Sondaı-aq ol memlekettik qyzmette, jergilikti ózin-ózi basqarý organdarynda jáne qarjylyq mekemelerde jumys isteý quqyǵynan ómir boıyna aıyryldy. Sondaı-aq odan «úshinshi sanattaǵy kapıtan» arnaıy sheni alyndy.
Al R.Ótegenov 2 jylǵa bas bostandyǵynan aıyryldy.
Olar jazalaryn qylmystyq-atqarý júıesiniń qaýipsizdik deńgeıi ortasha mekemesinde óteıdi.
Sot úkimi zańdy kúshine engen joq. Sottalýshylar 15 táýlik ishinde apellıatsııaǵa bere alady.