Almatyda áıelin uryp-soqqan er adamǵa aıyppul salyndy
ALMATY. QazAqparat – Almatyda kórshileri áıelin uryp-soqqan er adamdy vıdeoǵa túsirip aldy. Qalalyq Polıtsııa departamenti ókilderi oqıǵaǵa qatysty túsinik bildirdi, - dep habarlaıdy QazAqparat tilshisi.
Vıdeo jazba Facebook-te paıda boldy. Oqıǵa keshe túnde «Premera» turǵyn úı kesheninde bolǵan.
«Búgin túnde Almatydaǵy «Premera» turǵyn úı kesheninde kórshi turatyn er adam tynyshtyqty buzyp, áıelin uryp-soqty, esik qaqqandarǵa mán bermedi. Bul birinshi ret bolyp otyrǵan jaıt emes»,– delingen jazbada.
Sonymen qatar, habarlamada beınejazbanyń esiktiń qaraǵyshynan túsirilgeni aıtylady.
«Bul derek boıynsha kórshilerinen túnde tynyshtyqty buzýǵa qatysty shaǵym tústi. Oqıǵa ornynda tekseris barysynda birge turatyn juptyń spırttik ishimdik iship, arty daýǵa ulasqany belgili boldy. Alaıda jábirlenýshi dene jaraqatyn salý boıynsha shaǵym túsirýden bas tartty. Túnde tynyshtyqty buzǵandar ákimshilik jaýapkershilikke tartyldy», - dedi Naýryzbaı aýdandyq Polıtsııa basqarmasynyń bastyǵy Dıdar Ahanov.
