Almatyda áıelge tapansha kezengen avtokólik júrgizýshisi 7 táýlikke qamaldy
ALMATY. QazAqparat - Almatyda áıel adamǵa tapansha kezengen «Reındj Rover» avtokóliginiń júrgizýshi ustaldy. Bul týraly qalalyq ІІD baspasóz qyzmetinen habarlady.
Esterińizge sala keteıik, bul oqıǵa birer kún buryn Almaty qalasy, Alataý aýdanynyń «Zarıa Vostoka» shaǵyn aýdanynda oryn alǵan. Osy derek boıynsha «Deý» avtokóligin basqarǵan júrgizýshi áıel Alataý aýdanynyń ІІD júgingen.
Kelesi kúni-aq kúdiktiniń aty-jóni belgili bolyp, ol búgin ustaldy. «Reındj Rover» avtokóliginiń 28 jastaǵy júrgizýshisi «Deý» avtokóligine jol bermeı, ekinshi dárejeli joldan jol qıylysyna shyǵyp ketken. Artynsha toqtap, esiginiń shynysyn tómen túsirip, áıel júrgizýshige tapansha kezenip, qoqan-loqqy kórsetken. Al áıeldiń qasynda úsh jasar qyz bolǵan.
Júrgizýshiniń bul qylyǵy usaq buzaqylyq retinde belgilenip, isi sotqa berildi. Bir aıta ketetin jaıt, onyń tapanshasy tirkelgen eken.
Almaty qalalyq arnaıy mamandandyrylǵan soty QR ákimshilik Quqyq buzýshylyq kodeksiniń 330 babynyń 1 bólimi boıynsha «Reındj Rover» avtokóliginiń júrgizýshisi, Almaty qalasynyń turǵyny Renat Nasyrovty 7 táýlikke qamaý týraly úkim shyǵardy. Sonymen qatar, sot sheshimi boıynsha júrgizýshiniń tapanshasy tárkilenip, joıylmaq. Júrgizýshi óziniń kinásin tolyq moıyndaǵan. Sondaı-aq áıel júrgizýshi basqarǵan «Deý» avtokóliginde úsh jasar qyzdyń bar bolǵanyn baıqamaǵandyǵyn jáne sot úkimin buzdyrý týraly shaǵym bermeıtindigin jetkizgen.
Aıta keteıik, ustalǵan azamat tórt túrli quqyqbuzýshylyq áreketi boıynsha ákimshilik jaýapkershilikke tartyldy. Dálirek aıtqanda, ol kólikti tıisti qujatsyz basqarǵan, «Jol ber» dep atalatyn belgini eleń qylmaǵan, qaýpsizdik belbeýin taqpaǵan jáne saqtandyraý polısin rásimdemegen. Sonymen, oǵan salynatyn jalpy aıyppul somasy 64 myń 780 teńgeni qurady. Sondaı-aq quqyq buzýshynyń avtokóligi arnaıy avtoturaqqa qoıyldy.
