Almatyda áıelge baltamen tap bergen jas jigit ustaldy
NUR-SULTAN. QazAqparat – Kúdiktiniń jasy 27-de bolǵan, dep habarlaıdy QazAqparat tilshisi Almaty qalalyq Polıtsııa departamentiniń baspasóz qyzmetine silteme jasap.
«Almatydaǵy Túrksib aýdanynyń aýmaǵyndaǵy jeke sektorda birneshe saǵat buryn jas jigit qolyna balta ustap, serýendep júrgen. Tergeý amaldarynyń arqasynda anyqtalǵanyndaı, erli-zaıypty eki adam qydyrystan keıin úıine qaıtyp kele jatqan. Otbasynyń otaǵasy kishkentaı ulymen birge áıelin úıine deıin jetkizip, úıinde bógde er adamnyń baryn bilmesten, jumysyna kete barady. Alaıda áıeli men balasy qaqpany jaýyp, úıine qaraı betteı bergende tońazytqyshtyń ashyq turǵanyn kóredi. Odan keıin úı ishin aralaı kele jábirlenýshi áıel as úıde noýtbýktyń kolonkalary jatqanyn, al jatyn bólmede zattardyń shashylyp jatqanyn, dál sol bólmede eýropalyq sıpatty belgisiz er adamnyń shkaftardy aqtaryp jatqanyn kóredi», - delingen departamenttiń habarlamasynda.
Kúdikti er adam úıdiń otanasyn kórip qalǵannan keıin oǵan baltamen tap beredi. Áıel qoryqqanynan qasha jónelgenimen, jerge taıyp jyǵylǵan. Kúdikti osyny paıdalanyp, áıeldiń basynan baltanyń júzimen eki márte urǵan. Áıel qulap túskennen keıin qylmysker izin sýytyp, qashyp ketken.
«Jaralanǵan áıel esin jıyp, kishkentaı balasyn taýyp alyp, úlken ulyna qońyraý shalyp, ákesine habar berýdi suraǵan. Úıdiń otaǵasy bar-joǵy 10 mınýtta úıge jetip, sanaýly mınýttardyń ishinde polıtsııa qyzmetkerleri de úıge kelip úlgeredi. Kúdikti úıdegi zergerlik buıymdar men 100 myń teńge aqshany jymqyryp úlgergen. Polıtsııa birden iske kirisip, az ýaqyttyń ishinde álgi jigit ustaldy. Kúdikti 1992 jyly týǵan jigit. Buryn birneshe márte sottalǵan. Jumys istemeıdi», - delingen habarlamada.
Qazirgi ýaqytta kúdiktiden jaýap alynyp jatyr. QR QK-niń 192-baby 2-bóligi boıynsha sotqa deıingi tergeý amaldary júrgizilýde.
